DALAT: Palan Aktiviti Orang Tuai (PAWE) Dalat majak nerima timbal manah ari komuniti dia lebuh penyampau ti rejista udah manggai 1,120 iku naka Julai 2025.

Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madah, ari penyampau nya, bisi 505 iku lelaki seraya 615 da indu.

“PAWE ditumbuh sebagi ari inisiatif dikena negap pengelantang orang tuai ba pelilih Dalat ke alai pelasar ungkup orang tuai bejalaika aktiviti ninting hari komuniti menua tu.

“Kelimpah ari nya, PAWE nyendiaka servis ari sukut bantu rama ti ngintu pengelantang emosyen, runding enggau rama raban nya,” ku iya madah maya bejaku ba Program Bejadi Aum Besai Dua Taun Sekali PAWE Dalat Taun 2025-2027, di Kompleks Pengintu Pengelantang Dalat kena Hari Empat tu tadi.

Kaban Kunsil Nengeri (ADUN) Dalat nya mega minta perengkaguna disedia ba PAWE dikena enggau optimum ngambi genap kaban bulih pemaik ari palan nya.

Dato Sri Fatimah mega ngemerat pemesai reti kerejasama ba raban kaban PAWE dikena nerenak semangat baka diri sebilik, ngerapitka kaul sereta ngelangkar komuniti ti bela mantu pangan diri.

Ku iya madah baru, kelimpah numbuh PAWE, perintah Sarawak mega bejalaika macham insentif bukai dikena nyungkak pengelantang orang tuai.

Ku iya nerang, entara inisiatif ti disedia nyengkaum Bantu Orang Tuai (BWE), Palan Ngintu di Rumah Seri Kenangan (RSK) di Kuching enggau Sibu, Kenyalang Gold Card (KGC), Bantu Pemati (BIK) sereta Senior Citizen Health Benefit (SCHB) ti meri pemaik pengerai ngagai raban orang tuai.

Berebak enggau nya, iya nyemetak madah pemesai reti orang tuai semampai chakah ba aktiviti fizikal baka besenam ti engkeman nitih ke pengulih diri.

Bela datai ba program nya, Pegawai Pengintu Pengelantang Komuniti Pelilih Dalat Jacquiline Ebby Ramli, Chairman PAWE Dalat Moses Dominic Atong, Pakar Dementia Hospital Besai Sarawak, Dr. Shakilone Tharmaseelan sereta Sapit Tuai Pampang DUN Dalat Sait Seman.-EDISI UKAS