DEBAK: Pengelandik Jaku Inggeris ba raban nembiak sekula primari majak ditegap nengah pengawa ngatur Karnival Jaku Inggeris Renggat Sitak Betong ti diatur di Dewan Millennia Debak.

Sapit Menteri Pemansang Pengelantang Komuniti Sarawak ke mega Kaban Kunsil Nengeri (ADUN) Saribas, Datuk Mohammad Razi Sitam bejadika karnival nya, kena Hari Tiga tu tadi.

Karnival ti diatur begulai enggau raban pengajar enggau nembiak tu sebagi ari inisiatif besai dikena ngenegap pengelandik Jaku Inggeris ba raban nembiak sekula, bepun ari renggat primari agi.

Maya nya mega bela diatur pengawa nyua setipikit basa ngagai bala pengajar ti chakah ngadu program sereta pengawa nyua perais ngagai bala nembiak ti nyulut ba macham pekit ti dipejalaika sepemanjai karnival.

Bela datai, Pegawai Tadbir Menguasa, Opis Pelilih Mit Debak Mohd Khairurani Mohd Ibrahim, pengari Pegawai Pelajar Pelilih Betong, Kepala Pengajar Sekula Primari (SK) Debak Jelani Suhaili, Prinsipal Sekula Sekondari (SMK) Saribas Nur Liana Lim Abdullah sereta raban pengajar ari sekula semak Sitak Betong.-EDISI UKAS