TANJUNG MANIS: Pelajar ba Sains, Teknologi, Injiring enggau Matematik (STEM) sereta Latih Teknikal enggau Vokasional (TVET) majak diaku nyadi pelasar nempa pengelantang nembiak menua pesisir dudi hari.
Nitih ku Sapit Menteri Perambu Mengeri, Pengatur Tanah enggau Rampa Menua Sarawak, Datuk Len Talif Salleh, bidang STEM enggau TVET ukai agi tau dipilih tang bidang ti beguna ke deka mai Sarawak nuju nengeri mansang ti ngembuan penatai pemisi besai.
“STEM enggau TVET nempa pengelandik teknikal sereta ngelangkar timpai runding jauh, kreativiti enggau pengulih mutar penusah alai semua tu sebagi ari pengelandik ti besai amat guna dikena ba makit kereja maya hari tu,” ku iya.
Iya madah munyi nya maya bejadika program TEGAS Pro-DR Roadshow ke diatur Tabung Ekonomi Gagasan Anak Sarawak (TEGAS) di Dewan IKS Tanjung Manis, kena Hari Tiga tu tadi.
Nambah ke jaku iya, iya madah, program baka Pro-DR, sebagi ari singkang strategik dikena ngerapitka seraka pelajar kandang mengeri enggau menua pesisir setipak enggau prinsip ‘No One Left Behind’.
Iya ke mega Kaban Kunsil Nengeri (ADUN) Kuala Rajang sereta Chairman Kaunsil Amanah TEGAS bela ngelansa pemansang benung nyadi ba sitak Tanjung Manis nyengkaum pengawa ngaga Jematan Tuanku Haji Bujang enggau pengawa nampung jalai alun ngagai Sibu ti nyungkak kandang menua nya nyadi hab industri strategik negeri.
“Sektor baka betanam betupi moden, kilang, logsitik penyangkai kapal, pengawa berikan sereta kuasa ulih dikena baru benung ngerembai. Sektor tu begunaka pengereja pengawa teknikal ti bepengelandik,” ku iya.
Nitih ku iya, pengawa betanam betupi maya hari tu begunaka pengelandik bekenaka teknologi baka dron, sistem parit automatik enggau matau bepelasarka data, ti begunaka nembiak disikap enggau pengelandik ba bidang automasi enggau agro-teknologi.
Berebak enggau nya, iya ngelalau ngambi raban nembiak landik ba bidang teknologi enggau injiniring sereta nyadi ‘job creator’ dibanding semina nyadi ‘job seeker’.
Program Pro-DR bela ngemerat meri penemu tumu ngagai nembiak sekula primari nengah chara belajar interaktif sereta projek bepelasarka teknologi.
Sebagi ari inisiatif ti dikenataika iya nya program T&T Mini Lab ari TEGAS ti nyendiaka latih ba bidang robotik enggau ngena dron.
Dikena nyadi ke kelai saup iya ngagai pelajar teknologi di menua pesisir, iya bela madahka sepenyampau RM15,000 diberi kena numbuh T&T Mini Lab di SMK Belawai.
Bela datai maya nya, Residen Sitak Mukah Datu Kueh Lei Poh, Pegawai Pelilih Tanjung Manis Ismail Kasah, Tuai Pegawai Eksekutif TEGAS Udin Bujang sereta raban tuai opis perintah, bala pengajar, tuai bansa enggau genturung pendiau.-EDISI UKAS
