KUCHING: Servis Perintah Sarawak majak ngenegap pengelandik sereta pengelurus ngatur belanja nengeri nengah ngatur pengawa bepelasarka asil penatai pemisi, bekenaka kereban pekara wang digital sereta ngemeran prinsip pemeruan ba bajet.

Sekretari Perintah Sarawak, Datuk Amar Mohamad Abu Bakar Marzuki madah, macham inisiatif udah dikenataika ba sistem pekara wang sektor perintah nengeri, nyengkaum ngira enggau betul, bajet bepelasarka penatai pemisi enggau pengawa bekenaka teknologi digital.

"Inisiatif tu sebagi ari pengeransing nambahka kualiti, pengelandik sereta pemujur sistem pekara wang Servis Perintah Sarawak,” ku iya.

Iya madah munyi nya maya Program Bejadi Konferens Transformasyen Pekara Wang Sektor Perintah (PSFTC) 2025 ti dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ditu, Hari Tiga.

Nambah ke jaku iya, Datuk Amar Mohamad Abu Bakar madah, pengawa ngatur belanja perintah patut nengah ubah ti besai bepelasarka inovasyen lalu enda nitih chara lama.

"Kitai patut ngubah runding lama, lalu belabuh berati ke asil, empas sereta rega mata duit,” ku iya madah baru.

Datuk Amar Mohamad Abu Bakar bela ngemerat pemesai reti numbuh bajet 'gadung', ti nyengulai prinsip ESG (Menua, Rama enggau Atur) sereta ngelangkar pelin ngasil ke penatai pemisi baru ba landskap pekara wang sektor perintah maya hari tu.

Ku iya, nengah transformasyen tu, Sarawak ngembuan juluk ati deka ngelangkar servis perintah ti ukai semina bisi inovasyen ari sukut pekara wang, tang bepelasarka penemu rayat sereta nyamin pengelantang timpuh panjai.

Iya ngelalau semua ke gawa perintah, agensi perintah enggau kompeni bekaul perintah (GLC) ngambi beambi ulih enggau peluang ke bisi nengah konferens ke diatur nya nyadi alai mandang ke ubah ti meruan sereta mai penguntung ngagai rayat.-EDISI UKAS