KUCHING: Pengelandik ngatur belanja, lurus sereta strategik majak disungkak dikena nentuka pemansang nengeri tu lantang diatur sereta mai pemaik enggau penguntung ngagai rayat.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pengelandik ngatur belanja bepun ari nemu bagi penatai pemisi sebedau dipedua enggau sebela ngagai tiga batang pekara iya nya nguna, meranak puku enggau nyimpan.
"Enti kitai nitih prinsip tu, kitai ba jalai ti betul. Enti enda, penanggul akauntabiliti belanja deka nyadi lalu suah agi ketegal ari proses ti enda betul," ku iya.
Iya madah munyi nya maya bejadika Program Konferens Transformasyen Pekara Wang Sektor Perintah (PSFTC) 2025 ditu, Hari Tiga.
Nambah ke jaku iya, Datuk Patinggi Abang Zohari madah, Sarawak patut berati ke menua baka Finland, Sweden enggau Norway ti mujur ngemansangka ekonomi sida, taja pan menua mit tang landik ngatur pekara belanja.
"Baka Norway, taja pan baru ngereja minyak enggau gas nangkan kitai, sida diatu udah nyadi menua ti kaya laban sida nemu ngatur asil enggau betul. Tang kitai agi bekelikuh kenyau ari 1910,” ku iya.
Berindik ari nya, ku iya, Perintah Sarawak udah ngatur singkang proaktif nengah pengawa numbuh 'Dana Kekayaan Masa Depan Berdaulat Sarawak' nyadi belanja disimpan timpuh panjai ungkup pengelantang dudi hari.
Kelimpah ari nya, Perintah Sarawak ku iya, nentuka asil nengeri baka chukai enggau penatai pemisi ari sektor minyak diberi pulai baru nengah polisi ti mai pemaik ngagai rayat.
"Tu mih ke disebut aku proses ‘re-engagement’, alai polisi kitai meseti deka mai pemaik ngagai pengidup rayat,” ku iya madah baru.
Konferens enggau rambai jaku “Strengthening Public Finance for a Sustainable Future” nya nyadi pelasar dikena ngenegap atur pekara belanja sektor perintah nengah bekunsi penemu, randau enggau input ari sida ke landik.
Bela datai, Menteri Industri Pemakai, Komoditi enggau Pemansang Kandang Menua Sarawak, Dato Sri Dr Stephen Rundi Utom, Sekretari Perintah Sarawak, Datuk Amar Mohamad Abu Bakar Marzuki, Sapit Menteri Sarawak, Tuai Audit Menua, Dato’ Seri Wan Suraya Wan Mohd Radzi, raban tuai opis perintah sereta temuai dipebasa bukai.-EDISI UKAS
