BANDAR SERI BEGAWAN: Program Citarasa enggau Tautan Budaya Sarawak–Brunei 2025 ti terubah diatur ditu nyadi pelasar mantaika budaya Sarawak enggau Brunei Darussalam.

Sapit Premier Sarawak, Datuk Amar Awang Tengah Ali Hasan madah, Sarawak enggau Brunei bekunsi budaya ti kaya – ari pesaka pemakai, gari, seni enggau kaul diri sebilik.

Ku iya, program diatur Opis Dagang enggau Dagang Temuai Sarawak, Brunei (STATOB) nya beguna endar dikena narak pengelantang enggau semangat serantau Borneo.

“Budaya ngempung rayat enggau nya ngilah adan menua. Napi pemar dunya kemaya hari, program baka tu beguna endar dikena narak pengelantang enggau semangat serantau Borneo.

“Kitai bisi mayuh utai ti sebaka ti patut dirami. Ari sukut kulinari, kitai bekunsi pemakai asal baka linut, kelupis, asi girau, umai, manuk pansuh enggau kuih.

“Ba program tu, tukang sumai ari Sarawak datai ngenah mi kolok, mi jawa, kampua, laksa Sarawak, chendol Limbang, sambal tahai Lawas enggau mayuh agi ngambi sama nyepi,” ku iya.

Iya bejaku munyi nya ba jaku ngelaku rambau pengawa bejadi program Citarasa enggau Tautan Budaya Sarawak-Borneo 2025 di Stadium Negara Hassanal Bolkiah kena Hari Enam.

Program nya udah dipenyadika Menteri ba Opis Menteri Besai Brunei Darussalam, Dato Seri Setia Dr Awang Amin Liew Abdullah.

Ku iya, program nya mega dikearap ulih negapka kerejasama entara agensi enggau Dagang Mit enggau Jelan Pemesai (PKS) ari kededua raban.

“PKS besai pangku pengawa nyerungkai makit baru – sekali ke orang dagang Sarawak ke Brunei, tauka Brunei ke Sarawak – lebih agi ba sektor pemakai enggau kraf,” terang iya.

Sama datai, bini Datuk Amar Awang Tengah, Dato Dayang Morliah Awang Daud, Sapit Menteri Nembiak, Lumba enggau Pemansang Orang Dagang Sarawak Datuk Dr Ripin Lamat enggau Penyanding Penemu Opis Menteri Dagang  Antarabansa, Industri enggau Meranak Puku Sarawak (MINTRED) Dato Sri Mohd Naroden Majais, Tuai Pegawai Eksekutif STATOB Samat Junai enggau pemesai bukai.

Sepenyampau 20 raban pemandang ari Sarawak enggau 18 ari Brunei Darussalam ngambi bagi ba program ti diatur ari 2 nyentuk 3 Ogos tu.

Kelimpah ari pemandang pemakai, krafjari enggau produk lokal, bala pengusung mega diperindang enggau main asal pupu etnik di Sarawak enggau Brunei Darussalam. - EDISI UKAS