KUCHING: Projek Nangkir Pemesai Jalai Matang diatu udah digaga 62.2 peratus lalu disadang tembu tumu agi ari timpuh asal, Ogos taun siti.

Sapit Menteri Infrastruktur enggau Pemansang Penyangkai Kapal Sarawak, Datuk Ir. Aidel Lariwoo madah, projek tu lama ketegal bisi kaul enggau utiliti.

Taja pan pia, ku iya, pengawa bukai mujur digaga lalu bisi sekeda endur udah tembu lalu semina nganti tikas kepenudi ngaga jalai.

“Kami andal projek tu ulih ditembu tumu agi ari langgur ke udah ditetapka, iya nya Ogos siti,” ku iya madah maya dirandau pemberita pengudah ngabas projek nya, Hari Lima.

Kelimpah ari nya, Tuai Sekretari Politik Premier Sarawak Dato Fazzrudin Abdul Rahman ngarap projek tu ulih tembu jampat, abis laun bulan Januari tauka Februari taun dudi ketegal ngira jalai alun nya ditengah beribu iku mensia mayuh ninting hari.

Kaban Kunsil Nengeri (ADUN) Tupong nya bela ngelanggur ngambika siti agi jalai baru digaga ari Malihah terus ke FAC nyadi ke jalai muntang.

“Aku bela minta Perintah Sarawak, lebih agi Sapit Premier Sarawak Datuk Amar Douglas Uggah Embas enggau Datuk Aidel, ngambi berundingka langgur tu.

“Kelimpah ari nya, aku mega merambu pengawa ngaga jalai ari Malihah ngelawa Paroh lalu ngagai Sungai Maong dikena ngurangka penyekut di Jalai Matang sereta nyadi jalai muntang bukai.

“Mensia mayuh ke nengah Jalai Matang ulih ngena jalai muntang ke pasar, iya nya nengah jalai rembus ngagai FAC, tauka ari Simpang Malihah ngelawa Paroh tang jalai ke Paroh, engka begunaka jematan baru ti bekenaka ungkus besai agi,” ku iya madah baru.-EDISI UKAS