KUCHING: Sarawak udah ngerikod penusah babas angus ke nyadi ba Kuala Baram, Mukah, Marudi enggau Kota Samarahan berapa hari ti udah, tang semua diatu agi ulih dijaga.

Sapit Premier Sarawak ke mega Chairman Komiti Penyangga Penusah Ngenyit Nengeri (SDMC) Datuk Amar Douglas Uggah Embas udah minta Komiti Penyangga Penusah Ngenyit ba semua pelilih numbuh tim dikena napi penusah ti deka nyadi.

"Berapa hari ti udah, bisi babas angus nyadi ba Kuala Baram, Mukah, Marudi, enggau Kota Samarahan tang semua tu diatu agi ulih dijaga .

"Di Mukah, ujan bangat pagi tadi dikearapka ulih nyaup madam abis bara.

"Nya alai, mensia mayuh patut semampai nyikap diri dikena nentuka penusah angus enggau penanggul nadai bekal ai ulih dikurangka," ku iya madah pengudah ngulu aum SDMC ditu, Hari Empat.

Iya mega bela minta pengawa bekenaka dron dikena nyidi babas angus tumu agi, kelebih agi ba tanah kerapa ti rangkai sereta muntang agi angus.

Kelimpah hari nya, iya ngelalau mensia mayuh, nyengkaum kompeni enggau ke beempu tanah ngambi nyeliah penusah babas angus, kelimpah minta lengkas ngeripot enti sema bisi alai ke ditentu nyadi ‘hotspot’ ngagai Kaunsil Pengeraja Asal Enggau Rampa Menua (NREB) tauka opis pelilih menua.

Naka ke diatu, ku iya, 220 'hotspot' udah ditentu enggau Indeks Pengamah Angin (API) ba tikas agi ulih dijaga kelimpah di Mukah ti ngerikod IPU tinggi agi.

Berebak enggau nya, Datuk Amar Douglas Uggah mega madah, bisi 675 peminta udah minta ai irup udah diterima, mungkur 15,343 ruang bilik di selampur Sarawak, lalu Miri ngerikod penyampau peminta pemadu mayuh.

Bekaul guna dikena ngaga ujan, iya deka berati semua chara ti bisi dikena ngurangka isu ketegal kemarau.

"Taja pan pia, proses ngaga ujan ukai muntang laban begunaka remang sereta tikas embap ti engkeman, laban enti enda, semina garam ke labuh tang nadai ujan diasilka," ku iya nerang.

Bela datai, Sapit Sekretari Perintah Sarawak (Administrasyen) ke mega Sapit Chairman SDMC Datu Buckland Bangik. -EDISI UKAS