INDONESIA: Delegit ari Sarawak ti betuai ke Sapit Premier Sarawak, Datuk Amar Awang Tengah Ali Hasan udah ngatur pengerami makai lemai kaul strategik begulai enggau Kamar Dagang enggau Industri Indonesia (KADIN) nyadi sebagi ari pejalai gawa ke Balikpapan ari 25 nyentuk 27 Julai 2025.

Tuju pengerami ti diatur ba siti hotel tebilang di Balikpapan nya dikena negapka kaul dagang dua menua sereta ngerandang jalai kerejasama ekonomi ti rat agi entara Sarawak enggau Kalimantan Timur.

Pengerami nya mega diatur serimbai ‘Sarawak Connects Fair 2025’ lalu udah ngempuru bala tuai ari kededua menua ngambi berandauka peluang begulai ti bisi pengulih.

Nengah siti penerang kena Hari Lima, kaul strategik nya mega nyadi pelasar besai mantaika penau Sarawak ba mayuh sektor sereta nyerungkai pengulih kerejasama ba pengawa ti bisi penguntung begulai.

Sarawak ti datai ba Balikpapan mandangka juluk strategik kandang menua tu nyerariska perambu enggau peneras pemansang Nusantara, indu mengeri baru Indonesia ti semina takah berapa jam aja ari Balikpapan.

Ari peminta ti majak nambah ba infrastruktur enggau meranak puku di Kalimantan, kompeni ari Sarawak diperati udah sedia ngadu transformasyen rantau nya.

Pengawa nya sekali agi mandangka Sarawak ransing nanggam kaul ukai semina kerejasama dagang aja, tang mega kaul budaya enggau diplomatik.

Sama datai, bini Datuk Amar Awang Tengah, Dato Dayang Morliah Awang Daud, Sapit Menteri Nembiak, Lumba enggau Pemansang Orang Dagang Sarawak Datuk Dr Ripin Lamat enggau Sapit Sekretari Perintah Sarawak (Perambu Ekonomi enggau Pemansang) Dato Sri Dr Muhammad Abdullah Zaidel. -EDISI UKAS