PUSA: Industri bepelasarka nanas ba sitak Beting Maro diatu dipeda ukai semina pengawa betanam betupi, tang bisi pengulih nyadi penatai ekonomi menua nengah pengawa ngasil produk berega tinggi nyengkaum produk betenun ari daun nanas.

Kaban Kunsil Nengeri (ADUN) Betong Maro, Razaili Gapor madah, pengeransing ngemansangka produk nanas enda ngetu naka kus pengawa ngaga produk aja, tang deka diteruska enggau chara berenggat sereta saup ari macham agensi bekaul nyengkaum Opis Industri Nanas Malaysia (LPNM).

“Produk bepelasarka nanas ukai semina ke diempa aja, tang berega ba renggat antarabansa, lebih agi pengawa nenun ngena ubung ari daun nanas.

“Tu nengkebang awak baru ngagai rayat, lebih agi dikena ngasika pun penatai pemisi,” ku iya madah ba Program Nutup Kus Ngaga Produk Ukai Pemakai Bepelasarka Nanas ditu, kena Hari Dua tu tadi.

Nitih ku iya, macham inisiatif deka disediaka, nyengkaum kus nenun keringkam enggau songket ke deka diatur enda lama agi dikena ngerembai pengelandik sereta dipilih nyadi penatai ekonomi peranak menua nya.

Berebak enggau nya, iya meri terima kasih ngagai pengelicha sereta penyereta ke udah ngulu kus nya lalu madahka pengeransing sida nyadi sebagi ari singkang keterubah ngelangkar ekosistem industri nanas ti meruan ba sitak nya.-EDISI UKAS