MULU: Perintah Sarawak majak ransing nyaup rayat menua pesisir nengah belanja ari Projek Mit Menua Pesisir (MRP) nyengkaum RM442,000 diberi ngagai 28 iku penerima ari sitak Kunsil Nengeri (DUN) Mulu.

Sapit Menteri ba Opis Premier Sarawak (Pengereja Kasar, Imigresyen enggau Matau Projek) ke mega Kaban Kunsil Nengeri (ADUN) Mulu, Datuk Gerawat Gala madah, agih belanja MRP sebagi ari chara Perintah Sarawak nentuka bantu enggau pemansang majak diberi datai ba rayat mayuh.

“Naka Julai 2025, sepenyampau RM2.984 juta udah diberi nengah belanja MRP ADUN Mulu nyengkaum 216 peminta ke dikemendar.

“Tu ngayanka perintah ukai semina mending ke sebana rayat, tang nangkup guna rayat, lebih agi ba kandang menua pesisir,”ku iya.

Iya madah munyi nya maya Program Nyua Chek Geran MRP Kaban Kunsil Nengeri (DUN) Mulu ke diatur ba Palan Servis DUN Mulu, kena Hari Satu tu tadi.

Ba program sekali tu, sekeda ke nerima geran nyengkaum Gerempung Sepak Takraw Miri, Gerempung Peranak Long Atip, Kelab Lumba Highlanders, Serakup Berawan Sarawak, AJKK Indu Long Silat, PDK Sunflower Miri, Gerempung Alumni SMK Marudi sereta Gerempung Indai Patu Balu Bario Miri enggau semua penyampau manggai RM64,000.00.

Berebak enggau nya, Datuk Gerawat bela meri terima kasih ngagai semua ke majak bekerejasama enggau Opis ADUN Mulu sereta opis enggau agensi perintah ba pengawa ngemujur program pemansang enggau pengelantang rayat.

Program tu bela digulu tuai genturung pendiau, pegawai perintah enggau pengari penerima geran.-EDISI UKAS