LIMBANG: SePaL Excellence Award Ceremony (SEAC) 2025 ti diatur Sekula Sekondari (SMK) Seri Patiambun Limbang ukai semina ngerami penyulut nembiak, tang nyadi kelai penyerakup sekula, apai indai enggau komuniti ba pengawa ngenegap pelajar holistik bepelasarka penemu enggau ulah diri.

Program nya digulu lebih 300 temuai datai, nyengkaum Sapit Menteri Industri Pemakai, Komoditi enggau Pemansang Kandang Menua Sarawak ke mega Kaban Kunsil Nengeri (ADUN) Bukit Kota, Datuk Dr Abdul Rahman Ismail ngari ke Sapit Premier Sarawak, Datuk Amar Awang Tengah Ali Hasan.

Ngenataika jaku ari Datuk Amar Awang Tengah, iya nyemetak madah pemesai reti tanggungpengawa kolektif pengajar, apai indai enggau komuniti nempa nembiak ke ukai semina nyulut ba akademik, tang mega tegap ari sukut ulah diri enggau iring tuai.

“Penyulut nembiak sehari tu enda nyadi pia aja. Tang nya asil sinergi semua, nyengkaum pengajar ti ngajar enggau chukup pengeransing, apai indai ke seruran nyaup sereta nembiak nya empu endang bebendar,” ku iya.

Iya bela ngelalau raban pengajar semampai majak nyungkak inovasyen enggau kreativiti ba pengawa ngajar.

Kelimpah ari nya ku iya, apai indai meseti seruran nyaup anak sida iya belajar di rumah lalu enda nejuka tanggungpengawa nya ngagai sekula aja.

SEAC 2025 ngerami nembiak Pom 1 ngagai 5 ke udah mujur ba akademik sepemanjai taun.

Basa nya mega dikena nyadi ke peransang enggau awak nempa pengawa besemekih ba raban nembiak.

Sama datai, Penulung Pegawai Pelajar Pelilih Limbang Joseph Tindan, Prinsipal SMK Seri Patiambun Ziem Kassim, Yang Dipertua PIBG Stanley Liaw enggau Penulung Kanan Administrasyen Hasni Usop.-EDISI UKAS