LUBOK ANTU: Sarawak terus nyadi palan dipilih pemeranak puku luar ba bemacham sektor ti diserungkai Perintah Sarawak kelebih agi ba industri kuasa ti ulih dikena baru enggau kuasa gadung.

Sapit Menteri Dagang Antarabansa, Industri enggau Pengawa Meranak Puku Sarawak, Datuk Dr Malcolm Mussen Lamoh madah, sekeda pemeranak puku strategik udah mantaika minat meranak puku ba sektor kuasa gadung, industri hiliran enggau ekonomi digital.

“Pekara tu seraris enggau misyen perintah nengeri ngangkatka Sarawak nyadi nengeri maju manggai 2030,”ku iya ba Pengerami Tuai Begulai Enggau Rayat sereta Pejalai Ngabas Projek Transfomasyen Menua Pesisir (RTP) di Rumah Stanley Yong, Bara ditu kena Hari Lima.

Ku iya agi, sekeda pemeranak puku strategik udah mantaika minat meranak puku ba Sarawak seraya meri pangka positif ngagai ekonomi nengeri enggau nyendiaka peluang kereja baru ngagai rayat.

Ba pengerami nya, iya udah ngemendar agih belanja Projek Mit Pemansang Menua Pesisir (MRP) penyampau RM20,000 ngagai Komiti Pemansang enggau Pengelikun Genturung Pendiau (JKKK) Terusan Bara sereta RM10,000 ungkup Gerempung Indu.

Seraya ungkup tuju fasiliti rumah panjai, iya udah ngagihka belanja projek Program Transfomasyen Menua Pesisir (RTP) penyampau RM200,000 ungkup taun 2026. -EDISI UKAS