LUNDU: Kaban Kunsil Nengeri (ADUN) Opar, Billy Sujang, sehari tu ngatur penemuai gawa ngagai lima palan dikena iya nyua taba projek Program Transformasyen Menua Pesisir (RTP) di Opar.

Penemuai gawa ti diatur Opis Kereja Raya Pelilih Lundu nya digaga ba Kampung Temaga Dayak, Kampung Temaga Melayu, SMK Lundu, Kampung Raso 1 enggau Kampung Raso 2.

Tuju nyua taba ngagai kontraktor ke dichiri nya dikena nentuka pejalai projek RTP mujur digaga sereta nipak peminta enggau guna rayat menua nya.

Projek ke disua iya nya, Projek Nyeleti Balai Raya Kampung Temaga Dayak ti beungkus RM250,000, Projek Nyeleti Masjid Darul Iman di Kampung Temaga Melayu (RM70,000), Projek Nyeleti Dewan Makan SMK Lundu Renggat 2 (RM200,000), Projek Nyeruri Dapur Biro Indu Kampung Raso 1 (RM50,000) enggau Projek Nyeleti Endur Engkah Kerita ba Balai Mayuh Guna Kampung Raso 2 (RM100,000).

Semua penyampau ungkus lima iti projek RTP ke disua iya nya RM670,000. -EDISI UKAS