KUCHING: Sekula Primari China (SJK) Chung Hua Batu 11 diatu udah lebih 60 peratus tembu digaga.

Sapit Premier Sarawak, Datuk Amar Prof Dr Sim Kui Hian madah, sekula nya disadang tembu bulan Mac taun dudi.

"Projek tu deka tembu Mac ila, tang kebendar iya nya projek tu jampat digaga alai kitai udah ngatur pengawa nasih tanah bulan Oktober taun dulu.

"Diatu, pengawa ngaga begunan nya udah digaga ba ringkat kedua lalu diatu semak ngaga ringkat tiga, udah mayuh tembu sebedau taun 2026 datai.

"Nya alai, sida madah projek tu deka tembu manggai Mac 2026, digaga dalam kandang urung 15 bulan.

"Kitai gaga amat ati ke pengeransing semua ke udah bekerejasama, nyengkaum bala kontraktor ke manah, semua bela nyaup ngemujur projek tu,” ku iya madah.

Iya madah munyi nya maya dirandau pemberita pengudah ngabas taba projek SJK Chung Hua Batu 11 ditu, Hari Lima.

Ba pengawa nya, bela diatur iya nya nyua chek ari Perintah Sarawak ngagai kaunsil pengatur SJK Chung Hua Batu 11 sepenyampau RM1.5 juta ke bela digulu Tuai Sekretari Politik Premier Sarawak, Dato Fazzrudin Abdul Rahman.

Dato Fazzrudin ke mega Kaban Kunsil Nengeri (ADUN) Tupong meri terima kasih ngagai Datuk Amar Prof Dr Sim ke pengeransing iya ngulihka belanja tambah dikena ngaga sekula nya.

"Datuk Amar Dr Sim mai chek sepenyampau RM1.5 juta lalu diberi kitai ngagai kaunsil pengatur sekula ngambi ke sida ulih nampung ngaga pengawa.

"Kitai mega deka nentuka sekula tu tembu jampat awakka bala nembiak ulih ngasai perengka guna sekula baru jampat agi," ku iya madah.

Ke penemu mayuh, projek enggau kapasiti lebih 100 iku nya bekenaka belanja RM7 juta alai Perintah Sarawak udah nyua belanja sepenyampau RM4 juta nyengkaum meri belanja tambah sehari tu. -EDISI UKAS