KUCHING: Yang Amat Mulia Tengku Arif Temenggong Tengku Fahad Mua’adzam Shah Ibni Sultan Ahmad Shah kemari udah ngatur penemuai basa ngagai InvestSarawak dikena berati ke agi pengulih ekonomi Sarawak lalu nyerungkai peluang kerejasama strategik.
Penatai iya diambat Tuai Pegawai Eksekutif InvestSarawak, Timothy Ong Wye Ern ke bisi meri penerang ti komprehensif senentang langkar pengawa beranakka puku nengeri, sektor mansang enggau tanggungpengawa agensi nya nyaup pemansang ekonomi meruan enggau inklusif ba baruh Pelin Pemansang Udah COVID-19 2030.
Tengku Fahad ngayanka diri tekait ati ba visyen pemansang Sarawak ti progresif lalu ngaku tanggungpengawa InvestSarawak ngemuntang pengawa beranakka puku enggau kerejasama ekonomi entara kandang menua.
Pengawa betemu nya mega nyadi pelasar besilih penemu senentang sinergi ba sektor kuasa gadung, ekonomi digital, infrastruktur sereta sektor kilang ke mai penguntung setipak enggau juluk ati Sarawak nyadi hab meranak puku serantau.
Penemuai tu mega ngenegap pengeransing nyintal kaul strategik nempa transformasyen Sarawak nyadi palan meranak puku.
Sama datai, Dato’ Setia Pahlawan Tengku Dato’ Indera Aidy Ahmad Shah enggau Menijar Meranak Puku InvestSarawak, Bede Hong Teck Wee. -EDISI UKAS
