KUCHING: Pengawa mutar penusah baka bah, tanah tusur enggau biau balai (FLIRT) begunaka chara ti lebih komprehensif, ngena pelin sereta bepelasarka teknologi.
Ku Sapit Sekretari Mendam Opis Menteri Pengerai Mensia Mayuh, Pengawa Berumah enggau Perintah Lokal Sarawak (MPHLG), Desmond Douglas Jerukan, ari peneleba mutar penusah FLIRT ba sekeda bagi menua ba Sarawak nyengkaum di Tubau, Sri Aman enggau Bintulu, mandangka kitai begunaka sistem mutar penusah ti efektif agi, responsif enggau bepelasarka data sereta teknologi.
“Aku kala nyadi pegawai sitak di Tubau lalu ngasai kediri penusah ampuh bah ba SK Bukit ke ba atas bukit.
“Ba Sri Aman, kami nganjung ripot status bah tetiap jam, pengelama 24 jam ngagai sida ke bekuasa nengeri enggau Kaunsil Pengelikun Menua maya bah nya nyadi ba taun 2010,” ku iya.
Iya madah munyi nya maya bejadika Seminar Improving Flood Control in Stormwater Systems for Sarawak: Current Status, Challenges and Capabilities di Imperial Hotel, ditu, sehari tu.
Nambah ke jaku iya, iya madah, Sarawak diatu ba renggat kepenudi Langgur Pemansang Malaysia Lumpar Ke-12 (RMK12) lalu benung ba proses ngelangkar Langgur Pemansang Malaysia Lumpar Ke-13 (RMK13), ke deka ngemerat pengelantang rayat, pemansang infrastruktur digital enggau negap pengetan rayat napi penusah.
“Seminar tu engkeman laban input enggau langgur ke dikenataika ditu ulih dipasuk ngagai pelin pemansang RMK13.
“Nya alai, aku ngarap randau sehari tu ukai semina teknikal aja, tang mega ulih ngasilka bakani kitai tau mutar lalu mai ngagai projek ke bendar,” ku iya nerang.
Iya mega ngansak semua meda pekara tu enggau chara holistik, ukai nyadi pemar teknikal tang mega nyadi pekara besai ba pemansang sosioekonomi enggau nyaga rampa menua.
Sama datai iya nya pengari ari Unit Perambu Ekonomi Sarawak (EPU), agensi teknikal, bala bekuasa menua sereta pemekuh industri bekaul.
Seminar ti diatur begulai enggau MPHLG sereta kaban strategik nya, meri perati ngagai randau bekaul model hidrologi, inovasyen teknologi enggau kerejasama entara sektor peribit enggau perintah ba nyungkak pengulih ngatur bah enggau sistem parit ba Sarawak.-EDISI UKAS
