KUCHING: Kunsil Nengeri (DUN) Sarawak sehari tu ngemendarka Rang Undang-Undang (RUU) DUN (Komposisi Keanggotaan) 2025 dikena nambah pemayuh penuduk DUN ari 82 nyadi 99 iti.

Pemutus nya dipadahka Speaker DUN Sarawak, Tan Sri Datuk Amar Mohamad Asfia Awang Nasar sepengudah nerima sukung majoriti Kaban Kunsil Nengeri (ADUN).

RUU nya bela dipejuraika 29 ADUN ari perintah enggau dua ari penyakal.

Dulu ari nya Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, pemayuh nyukung RUU nya mandangka pengari rayat Sarawak deka meda ubah pengelantang pengidup rayat.

“DUN tu meseti semampai dinamik, semampai responsif enggau ubah demografi sereta pematut nambah penuduk ti nentuka iya seruran bepelasarka peminta enggau pengingin rayat," ku iya madah.

Iya madah munyi nya maya macha RUU nya ketiga kali ba Aum Khas di DUN Sarawak, Hari Satu.

Dato Sri Abdul Karim mega madah, RUU nya ukai semina dikena ngaga entara baru endur pengawa bepilih tang mega deka nentuka semua penemu rayat selampur Sarawak dibai datai ba DUN nengah ADUN sebedau ngaga langgur nitih pematut.

Iya enggau nya ngenggaika penemu dua iku ADUN ari Parti Tindakan Demokratik (DAP) ti madah ke RUU nya semina ngeringka agi Parti Gabungan Sarawak (GPS).

“GPS tauka perintah nengeri tu nadai kuasa nentuka dini endur 17 iti penuduk baru nya laban tu bepanggai ba Komiti Pengawa Bepilih Suruhanjaya Pilihan Raya (SPR),” ku iya terang madah. -EDISI UKAS