KUCHING: Pengawa nambah penuduk Kunsil Nengeri (DUN) Sarawak sebagi ari pengeransing ngerapitka seraka pemansang menua pesisir enggau mengeri.

Kaban Kunsil Nengeri (ADUN) Katibas, Lidam Assan madah, menua pesisir diatu benung napi pemansang deras baka infrastruktur nyengkaum jalai alun, sekula, hospital enggau pemansang bukai, ngujung ke nyau majak kompleks lalu begunaka perati lebih agi.

Nya alai, iya madah, pengawa ngatur ti manah agi ulih digaga enti sema kandang endur ke dipegai mit agi.

“Penuduk baru tu ulih nyaup pemansang alai bajet pemansang diungkup enggau pengelurus dikena nyemela ke pemansang menua pesisir enggau mengeri.

“Tu ulih nyadi nyata laban pengari rayat ke dipilih deka nyaga sitak ke mit agi enggau populasyen ke muntang agi diatur, lalu ngurangka penanggul enda dikeibuh,” ku iya.

Iya madah munyi nya maya bejuraika Rang Undang-Undang (RUU) Kunsil Nengeri (DUN) (Komposisi Keanggotaan) 2025 serimbai Aum Khas di DUN Sarawak, Hari Satu.

Nitih ku iya, enti enda digaga ke entara baru sereta nambah penuduk, mayuh kandang menua ulu ti besai enggau jauh betakah ari pangan diri deka majak tinggal laban tating pengawa ti besai disan siku pengari rayat aja.

Berebak enggau nya, Lidam nyemetak madah, nyema pekara tu enda diputar diatu, pengari ke dipilih engka ngari ke mayuh peranak menua ti dibanding ba sitak ke bukai, lalu ngujung ke pemansang enda sebela sereta bechiping. -EDISI UKAS