LUNDU: Rayat pupu bansa di Sarawak dipinta semampai nyaga enggau ngetan penyerakup seriris enggau pelin pemansang Perintah Sarawak.

Sapit Premier Sarawak Datuk Amar Douglas Uggah Embas madah, penyerakup beguna bendar dikena nyukung Pemeras Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg mai pemansang sereta numbuhka penatai pemisi nengeri tu.

"Ketegal nya Perintah Sarawak udah nengkebang macham inisiatif pemansang nyengkaum Pelin Pemansang Udah COVID-19 (PCDS) 2030 kelimpah numbuhka lapan agensi pemansang kandang menua," ku iya madah.

Iya bejaku munyi nya maya Pengerami Makai Lemai Mantar Gawai Dayak Pelilih Lundu 2024 Di Lundu, Hari Tiga tu tadi.

Dulu ari nya ba jaku iya, Kaban Kunsil Nengeri (ADUN) Opar, Billy Sujang ke mega penyanding penemu komiti pengerami madahka pengerami nya nyadika kelai pemanah penyerakup ti nyadi pugu pengelantang di nengeri tu.

Ku iya, pengerami ke diatur nya bela mandangka pemesai reti saum penemu sereta ulah pupu raban bansa rindu begulai enggau pangan diri.

Ba pengerami nya, Datuk Amar Douglas Uggah bisi ngungkupka geran RM50,000 ngagai Komiti Besai Pengerami Gawai Dayak Pelilih Lundu. -EDISI UKAS