KUCHING: Sarawak deka nyadi tuai rumah alai ngatur Borneo International Integrity Summit (BIIS) 2025 ari 29 ngagai 30 Julai tu ba Palan Konvensyen Borneo Kuching (BCCK).
Sapit Menteri ba Opis Premier Sarawak (Integriti & Ombudsman), Datuk Dr. Juanda Jaya madah, konferens ti diatur Perintah Sarawak nengah Unit Integriti enggau Ombudsman nengah kerejasama Universiti Putra Malaysia (UPM) Pampang Sarawak enggau Konsortium Universitas Borneo (KUUB) nya dipelaba deka digulu lebih 800 penyereta ari dalam enggau menua luar.
“Tuju konferens tu diatur dikena nambahka penemu senentang integriti enggau pengawa ngatur sereta nempa modal mensia enggau ulah integriti seriris enggau pemansang Sarawak nuju 2030, lalu nerenak iring tuai enggau etika ba raban nembiak baru,” ku iya ba aum media di Baitulmakmur II ditu, Hari Lima.
Konferens dua hari berunggu nya disadang dipenyadi Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg kena 29 Julai 2025 pukul 3 lemai.
Ngangkatka rambai jaku “Driving Innovation, Transparency and Ethical Leadership for a Sustainable Future”, program nya dikeandal digulu penyereta ari bala akademik, orang gawa perintah, nembiak universiti enggau nembiak sekula sekondari ari Malaysia, Indonesia, Brunei sereta menua sepiak.
“Bisi 31 universiti enggau kolej ari empat menua dibai ngulu konferens nya, lalu nembiak ari enam buah sekula sekondari semak Kuching, Samarahan enggau Serian bela bisi enggau dikena nerenak ulah integriti ari renggat tumu,” ku iya nerang.
Nambah ke jaku iya, Datuk Dr. Juanda madah, Sarawak ukai semina ngemerat pemansang ari sukut pengelandik teknikal enggau teknologi baka hidrogen enggau teknologi gadung aja tang mega ngemerat pengawa nempa ulah diri enggau etika ba raban nembiak dudi hari.
Ku iya, pengawa tu disukung rentayan KUUB nyengkaum 16 universiti ari Brunei, Indonesia (lebih agi Kalimantan), Sabah, Sarawak enggau Labuan lalu Universiti Putra Malaysia (UPM) Sarawak nyadi sekretari mendam konsortium nya.
Kelimpah konferens, pengawa maya nya bela dirichah enggau program pemandang ari institusyen pelajar rantau ASEAN nyengkaum CENTEXS, Sarawak Skills, ICATS University College, Universiti Teknologi Sarawak (UTS), Universiti Malaysia Sarawak (UNIMAS), Universiti Institut Teknologi Mara (UiTM) Samarahan enggau Curtin University.
Nambah ke jaku iya, iya mega madah, siti Sempekat Pemereti Ati (MoU) mega deka ditanggam entara KUUB enggau Unit Integriti enggau Ombudsman Sarawak dikena ngenegap kerejasama ba pengawa nerenak ulah integriti ba institusyen pelajar tinggi.
“Program tu ukai semina pelasar intelektual tang siti singkang ti kolektif nempa Borneo ke lebih lurus dudi hari.
“Kitai mega ngelanggur deka ngatur BIIS dua taun sekali ba Sarawak,” ku iya madah baru.-EDISI UKAS
