KUCHING: Lumba Borneo 2025 ke deka diatur ari 24 ngagai 28 September tu ba Kompleks Lumba Petra Jaya, Kuching digulu enam kontinjen iya nya Sarawak, Sabah, Labuan, Brunei Darussalam, Kalimantan Barat enggau Kalimantan Timur.

Menteri Raban Nembiak, Lumba enggau Pemansang Orang Dagang Sarawak Dato Sri Abdul Karim Rahman Hamzah madah, bisi lapan bansa pekit diatur maya nya nyengkaum main lama.

"Main ke deka diatur iya nya badminton, boling padang, 'archery', olahraga enggau nyemerai.

"Main lama ti bela diatur iya nya nyumpit enggau batak tali kelimpah bisi golf VIP," ku iya madah.

Iya bejaku munyi nya ba aum media ditu, Hari Lima.

Dato Sri Abdul Karim mega madah, pengawa ngerejista nama deka dibuka belabuh ari 14 Julai nyentuk 29 Ogos 2025.

Ba pekara bekaul, iya madah, bela dilanggur iya nya nyendiaka endur bejual ungkup sida menua bukai ngambika bela mai produk ari menua diri empu maya pekit nya diatur ila.

"Ari nya, aku andal, tu deka negapka agi kaul enggau pangan diri kelimpah sida ti ngambi bagi ba pekit," ku iya madah baru.

Dato Sri Abdul Karim madah, Lumba Borneo kepenudi diatur ba taun 2013 di Wilayah Persekutuan Labuan.

Bela datai ba aum media nya, Sapit Menteri Raban Nembiak, Lumba enggau Pemansang Orang Dagang Sarawak Dato Gerald Rentap Jabu enggau Sekretari Mendam Opis Menteri Raban Nembiak, Lumba enggau Pemansang Orang Dagang Sarawak Morshidi Fredrick.-EDISI UKAS