KUCHING: Sarawak patut numbuhka siti ekosistem pengerai berurun nyengkaum servis ti bisi kualiti, kilang perubat, pansik sereta pengereja pengawa ti chukup.

Sapit Premier Sarawak, Datuk Amar Profesor Dr Sim Kui Hian madah, pekara tu deka nentuka Sarawak ukai semina bisi servis baka dagang temuai perubat tang mega deka nyulut ba pengawa mansik, ngasil sereta nyual produk berubat ngagai renggat global.

“Nyadi, ba kami, servis nya besai amat reti nyengkaum ba hospital enggau pekara ke bekaul.

“Udah nya, kitai ngaga pansik, laban kitai bisi pengulih numbuh bidang perubat ti dipadah regeneratif.” ku iya.

Iya madah munyi nya maya dirandau pemberita pengudah bejadika ‘5th International Burn and Wound Conference’ (IBW) ke diatur ba sebuah hotel ditu, Hari Lima.

Nangkan pekara nya, Datuk Amar Dr Sim ke mega Menteri Pengerai Mensia Mayuh, Pengawa Berumah enggau Perintah Lokal Sarawak madah, sebuah kompeni ari Amerika Syarikat deka numbuhka kilang ngaga kolagen ditu dikena ngubat telih enggau nganti tisu.

“Apin lama tu tadi, sebuah kompeni ari Amerika Syarikat bekaul pengawa ngubat telih enggau ngasil kolagen udah betemu enggau Premier Sarawak enggau aku.

“Sida deka numbuhka sebuah kilang di Sarawak dikena ngaga kolagen ngena teknologi moden," ku iya nerang.

Nerang silik pekara nya, iya madah, penyampau ari meranak puku deka manggai entara USD20 juta ngagai USD40 juta alai kilang nya ila deka digaga ba Kuching. -EDISI UKAS