KAPIT: Bisi 68 gerempung nerima Geran Projek Mit Menua Pesisir (MRP) sepenyampau RM686,000 ba sebengkah pengawa ke diatur di Hotel Meligai ditu, kena Hari Satu tu tadi.

Program ke diatur Palan Servis ADUN Bukit Goram nya udah dipenyadi Sapit Menteri ba Opis Premier Sarawak (Undang-Undang enggau Adat Bumiputera) ke mega ADUN Bukit Goram, Datuk Jefferson Jamit Unyat.

Ba jaku iya, Datuk Jefferson madah, belanja MRP ke diberi nya ukai semina bantu aja tang kelai pengandal ati enggau pengingin deka meda ubah nyadi di menua nya.

“MRP ukai semina chek tang mega nyadi kelai pengandal ati enggau pengingin deka meda ubah.

"Ubah ari sukut perengka guna, ulah rindu besaup gawa enggau saup rayat nempa dudi hari ke manah agi,” ku iya.

Iya ngelalau semua ke nerima chek nya bejalaika projek sida enggau pengelurus ungkup pengelantang begulai.

Nambah ke jaku iya, iya madah, ari baruh iring tuai dipegai perintah Gabungan Parti Sarawak (GPS), macham pemansang infrastruktur enggau ekonomi udah sereta benung chakah dipejalai ba kandang menua pesisir, nyengkaum jalai alun ke muka jalai baru ditengah peranak menua ulu dikena sida nyual asil betanam betupi enggau krafjari ngagai mengeri.

“Sukung tegut ngagai Perintah GPS besai amat reti dikena nentuka pemansang ti inklusif enggau sebela di selampur Sarawak,” ku iya madah baru.

Sama datai, Sekretari Politik Premier Sarawak, Watson Awan, Pegawai Pelilih Kapit, Cerislogo Sabut, pengari Opis Residen Bagi Menua Kapit, Daniek Batin, sereta raban tuai genturung pendiau nyengkaum Pemancha enggau Penghulu menua nya.-EDISI UKAS