DALAT: Menteri Pemansang Indu, Nembiak Mit enggau Pengelantang Komuniti ke mega Kaban Kunsil Nengeri (ADUN) Dalat, Dato Sri Fatimah Abdullah udah ngabas taba ke diperambu endur ngaga projek Balai Bomba enggau Penyah Penusah Dalat, kena Hari Satu tu tadi.

Iya disempulang Residen Bagi Menua Mukah, Datu Kueh Lei Poh, Sapit Direktor Bomba Nengeri Sarawak, Tiong Ling Hii enggau Chairperson Kaunsil Pelilih Dalat enggau Mukah (MDDM), Kr. Arini Suhaili.

Nitih ku Dato Sri Fatimah, pengawa ngaga opis bomba tu dikena nipak peminta rayat di Dalat ti udah dikemendarka digaga nengah Rolling Plan Kelima (RP5) Pelin Pemansang Malaysia Lumpar Ke-12 (RMK12).

"Aku minta semua agensi bekaul nurun ngabas nentuka projek tu mujur digaga," ku iya.

Iya mega madah, endur ngaga projek nya semak Kompleks Pengintu Pengelantang Dalat endang engkeman nyerumba langgur ngaga New Dalat Service Centre.

Projek nya diungkup enggau agih belanja sepenyampau RM9.8 juta lalu disadang berengkah digaga pun taun 2026 dalam kandang 19 bulan sereta dipelaba tembu ba taun 2027.

Kelimpah ari nya, projek tu mega nyengkaum pengawa ngaga kuarters baka apartmen raban bomba.

“Sitak Mukah dulu agi ari sitak bukai laban kitai udah bisi taba ke udah dikemendar endur ngaga projek.

"Nyema bisi peminta dudi hari ila, kuarters tu mega ulih dikena orang gawa di Dalat ke bukai,” ku iya.-EDISI UKAS