KUCHING: Karnival Lumba Media Sarawak (KASUMeS) ukai semina pelasar lumba enggau ngisi maya lepa, tang bela nyadi medium ngerapitka kaul pengemeran media enggau agensi perintah menua tu.

Ku Direktor Unit Komunikasi Awam Sarawak (UKAS), Awang Putrayusrie Awang Redzuan, program tu bela negap kerejasama raban media enggau perintah.

“Raban media kitai, maya kitai gawa, bejalaika pengawa nyadi pemberita, kitai mega patut belelak awak ke tubuh kitai gerai, ati kitai pan lantang neruska kereja kitai,” ku iya.

Iya madah munyi nya maya Program Bejadi KASUMeS 2025 Zon Selatan ke diatur di Pickleball MUSC Sarawak, ditu, Hari Dua.

Program nya udah dipenyadi Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol.

Nitih ku iya, KASUMeS 2025 udah diatur enggau chara berenggat ba tiga zon, iya nya, Zon Tengah di Sibu (15 Mei), Zon Utara di Miri (24 Mei) enggau Zon Selatan di Kuching (24 Jun).

Ba renggat di Kuching, ku iya, program ti mungkur tiga bansa lumba iya nya, pickleball, boling enggau badminton digulu tim ari media, opis sereta agensi perintah.

Iya mega muji semua ke bekaul ti udah mujur ngatur KASUMeS 2025, nyengkaum UKAS, TVS, Cats FM, RTM, Bernama, Borneo Post, Suara Sarawak, FINAS, United Daily News, Kupi-Kupi, Sin Chew Daily, International Times, Utusan Borneo enggau Opis Komunikasyen Komuniti (J-KOM).

Enda tinggal, iya mega beterima kasih ngagai kaban strategik baka Opis Bepilih Nengeri Sarawak, Dewan Bandaraya Kuching Utara (DBKU), Kaunsil Lumba Sarawak, Kaunsil Islam Sarawak, Opis Pengintu Pengelantang Mensia Mayuh Malaysia, Opis Ukur enggau Pemetaan Malaysia, Raban Koperasi Nasional Malaysia Berhad enggau Opis Nembiak enggau Lumba Nengeri Sarawak ke sukung enggau kerejasama ngemujurka program nya.-EDISI UKAS