KUCHING: Karnival Lumba Media Sarawak (KASUMeS) deka diatur ninting taun serimbai Hari Pemberita Nasional, nyadi pelasar ngenegap kaul perintah nengeri enggau raban media ditu.
Sapit Menteri ba Opis Premier Sarawak (Pekara Korporat, Pemadah enggau UKAS), Datuk Abdullah Saidol madah, program ke diatur Unit Komunikasi Awam Sarawak (UKAS) tu ukai semina alai ngisi maya lepa sereta ngelaku gaya idup bepengerai, tang mega ngerapit kaul pengemeran media sereta perintah nengeri.
“Kitai deka nandu program baka tu tiap taun serimbai Hari Pemberita Nasional nitih ke zon, iya nya, Miri, Sibu enggau Kuching, lalu naka ke diatu semina sekeda lumba enggau main ke dipilih dipekit kitai, nyengkaum ’pickleball’, badminton, futsal enggau main bukai,” ku iya ba Pengerami Bejadi KASUMeS 2025 di Pickleball MUSC Sarawak ditu, Hari Dua.
Sama datai, Direktor UKAS, Awang Putrayusrie Awang Redzuan.
Nerang silik, iya madah, macham penemu baru benung dirunding deka dipasuk ba renggat nangkan tu ila.
“Kitai raban media, enda ngira ari agensi ni suah agi betemu ba program formal tauka aum media.
"Program baka KASUMeS tu meri awak ngagai kitai begempuru enggau pangan diri.
“Engka udah tu kitai tau ngatur pengawa bukai nyengkaum nemuai ngagai Bakun tauka Mulu ke digela Palan Pesaka Dunya. Bisi ke rindu pengawa baka tu, enti nadai penanggul kitai deka ngelanggur ngatur,” ku iya.
Iya mega merambu tiap agensi media numbuhka tim sida iya empu, dikena ngulu program lumba tauka main, kelimpah ngelanggur penumbuh komiti mit ari pengari media dikena nyaup UKAS nyeraris ngatur program ba dudi hari.
Berebak enggau nya, iya ngelalau bala media terus entap nyadi kaban strategik besai perintah nengeri ba ngenataika penerang ngagai rayat.
“Aku ngarap raban media majak bekerejasama enggau perintah dikena nentuka inisiatif enggau pengeransing perintah nengeri datai ngagai rayat.
“Besai reti kitai ngenataika polisi sereta inisiatif Premier Sarawak enggau terang sereta semua renggat rayat mereti ke polisi nya,” ku iya.
KASUMeS 2025 mujur ngempuru pengemeran media ari macham agensi di selampur Sarawak.-EDISI UKAS
