SINGAPURA: Sarawak ngansak kerejasama serantau enggau global disungkakka agi ba pengawa napi sereta mutar penanggul bekaul ngatur bekal ai.
Menteri Utiliti enggau Telekomunikesyen Sarawak, Dato Sri Julaihi Narawi madah, ubah klimet lebih agi nanggul gaya hari ti enda tentu nyengkaum bekaul ai.
Iya enggau nya ngerintai macham pengawa ulih digaga enggau chara besaup dikena ngatur pun penatai ai sereta besaup nentu pemeruan rampa menua ti tau bendar ngurangka agi penanggul ti ngepunka ubah klimet.
"Nadai menua ulih napi penanggul tu kediri enti bekaul enggau chara ngatur pun penatai ai, lalu ari nya, kerejasama serantau enggau global beguna bendar ngurangka penanggul ketegal ubah klimet.
"Sarawak ngelaluka kerejasama global ti bela mungkur chara ngatur, teknologi moden enggau aplikeksyen proses, melanja enggau pemeranak puku prebet, nempa kapasiti, bekunsi penemu teknikal enggau pengelandik," ku iya madah.
Iya bejaku munyi nya maya ‘Regional Partnerships – Tapping Southeast Asia’s Water Market Regional Synergy in Tackling Shared Water Challenges’ ba Singapore Business Forum @ Spotlight Singapore International Water Week 2025 ditu, Hari Satu.
Nambah ke jaku iya, Dato Sri Julaihi madah, sebagi ari chara ke digaga Sarawak dikena nentuka ai beresi sereta likun iya nya ngatur pun penatai bekal ai ba endur ti engkeman.
Ba pekara nya ku iya, 28 iti endur enggau pemesai empat juta hektar tauka urung 30 peratus udah digazet nyadi endur nimbun ai.
Kelimpah ari nya, iya madah, Sarawak mega chakah ngatur pengawa besilih sereta bekunsi penemu teknikal enggau pengelandik nengah macham pelasar antarabansa.
Tu nyengkaum ngatur Borneo International Water & Wastewater Exhibition & Conference (BIWWEC) dua kali setaun, ngulu Kongres & Program Pemandang Ai Dunya Gerempung Ai Antarabansa (IWA) ba taun 2024 enggau 2026 lalu deka ngatur program nya di Sarawak ungkup taun 2028.
Ukai semina nya, Sempekat Pemereti Ati (MoU) antara Gerempung Ai Malaysia (Pampang Sarawak) enggau Gerempung Ai Singapura udah ditanggam kena Jun 2024 ti ngemuntangka kerejasama ba pemansang bekal ai menua pesisir.
"Mayuh awak kerejasama serantau enggau global ulih ditempa nyengkaum ngena teknologi digital enggau inovatif, nyerungkai pengulih kerejasama perintah enggau prebet enggau nempa kapasiti," ku iya madah baru.
Ba pekara bukai, Dato Sri Julaihi nguluka deligit Sarawak nemuai ngagai Institut Mansik Rampa Menua & Ai Nanyang (NEWRI) enggau Separation Technologies Applied Research & Transfer Centre (START).
Penemuai sida deka berati kereban mansik enggau teknologi ke dikena ba sektor ngatur ai.
Sida mega bisi nemuai ngagai Public Utilities Board (PUB) Command Centre.
Deligit Sarawak bela disempulang Sekretari Mendam Opis Menteri Utiliti enggau Telekomunikesyen Sarawak, Datu Jafri Lias, Direktor Opis Bekal Ai Menua Pesisir Sarawak, Ir. Ts. Awang Mohammad Fadillah Awang Redzuan enggau Chairman Gerempung Ai Malaysia (Pampang Sarawak), Ts. Kelvin Kuek Hann Yih.-EDISI UKAS
