KUCHING: Rambai jaku Segulai Sejalai ari jaku Iban dikearap deka majak dikena Perintah Malaysia enggau Perintah Sarawak ti mandangka ulah sepenemu, diri sebilik enggau penyerakup ke nyadi pelasar pengelantang menua.

Sapit Menteri ba Opis Premier Sarawak (Pengereja Kasar, Imigresyen enggau Matau Projek), Datuk Gerawat Gala madah, bansa Dayak seruran ingat maya Menteri Besai Dato Seri Anwar Ibrahim ngangkatka rambai jaku nya dikena di selampur Malaysia.

"Kami, bansa Dayak, agi ingat pengerami makai lemai Gawai Dayak ke mega diatur ditu, taun dulu.

"Menteri Besai udah mandangka rambai jaku Segulai Sejalai endang engkeman dikena nyadi kelai penyerakup enggau pengelantang rayat Malaysia.

"Kami ngarap rambai jaku Segulai Sejalai deka terus dikena bala tuai kitai," ku iya maya bejaku ba Pengerami Makai Lemai Ngintu Hari Gawai Renggat Sarawak 2025 ba Palan Konvensyen Borneo Kuching (BCCK) ditu, kena Hari Minggu tu tadi.

Yang di-Pertua Negeri Sarawak Tun Pehin Sri Dr Wan Junaidi Tuanku Jaafar sereta bini, Toh Puan Fauziah Mohd Sanusi, Menteri Besai Dato Seri Anwar Ibrahim enggau Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg datai ngerichah pengerami nya.

Datuk Gerawat mega meri besai terima kasih ngagai Perintah Sarawak laban udah masa rayat Orang Ulu bejadika Pengerami Gawai Dayak Renggat Nasional ba taun 2025.

Ku iya nerang, tu dikena meri awak ngagai rayat menua ulu ngerami daya idup sida begulai enggau raban bansa Bidayuh enggau Iban.

Ba pengerami nya, Menteri Besai udah nyuaka tiga Anugerah Ikon Dayak ngagai bansa Orang Ulu.

Kategori Lumba udah diberi ngagai Jonathan Nyepa lalu kategori penau nyulut diempu Francisca Luhong James ditangkan kategori seni diempu Mathew Ngau.

Sama datai, Sapit Menteri Besai Datuk Patinggi Dr Ahmad Zahid Hamidi, Yang di-Pertua Dewan Negara Senator Dato Awang Bemee Awang Ali Basah, Menteri Besai Selangor Dato Seri Amirudin Shari, Sapit Premier Sarawak ke mega Chairman Komiti Besai Pengerami Ngintu Gawai Dayak Renggat Sarawak 2025 Datuk Amar Douglas Uggah Embas, Sapit Premier Sarawak Datuk Amar Awang Tengah Ali Hasan enggau Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, raban Menteri Kabinet Perintah Besai enggau Sarawak, raban Sapit Menteri Kabinet Sarawak, Tuai Opis Perintah, sereta pemesai ke bukai. -EDISI UKAS