KUCHING: Juluk ati Perintah Sarawak ke deka nyadi hab besai Grid Kuasa Gerempung Menua Asia Tenggara (ASEAN) disukung Menteri Besai, Dato Seri Anwar Ibrahim.

Ku iya, strategi enggau pelasar ASEAN maya hari tu, iya nya, inisiatif nyambung Grid Kuasa ASEAN serantau ke nyadi siti pekara besai ti deka ngenegap integrasyen sereta nempa rantau Asia Tenggara ulih besemekih.

Iya madah, pekara tu bela dirintai ba Penerang Kuala Lumpur bekaul ASEAN 2045 ke udah disetuju semua tuai ASEAN lalu mandangka pengeransing nempa dudi hari ke lebih meruan sereta inklusif.

“Nyadi, nadai salah enti ba pegai Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau pengelebih Sarawak kitai ulih ngemansangka kandang menua tu nyadi hab kuasa besai ke deka dikemegahka rayat Sarawak enggau Malaysia.

“Enggau pengelebih pengeraja asal baka gas enggau hidrogen enggi Sarawak, kitai ngembuan pengulih datai ba makit kuasa ukai semina ngagai Sabah enggau Kalimantan, Indonesia, tang mega nyentuk ngagai selatan Filipina,” ku iya.

Iya madah munyi nya maya bejaku ba Pengerami Makai Lemai Hari Gawai Renggat Sarawak 2025 ke diatur ba Palan Konvensyen Borneo Kuching (BCCK) ditu, kena Hari Minggu tu tadi.

Sama datai ba pengerami nya, Yang di-Pertua Negeri Sarawak Tun Pehin Sri Dr Wan Junaidi Tuanku Jaafar serta isteri, Toh Puan Datuk Patinggi Fauziah Mohd Sanusi enggau Datuk Patinggi Abang Zohari.

Dikena bejadi juluk ati tu, Menteri Besai nyemetak madah, bisi langgur strategik ke patut diperumban sereta chakah dipejalai, iya nya, pengawa masang kabel dalam tasik ke nyambung Semenanjung Malaysia ngagai Singapura enggau Batam.

Senentang penemuai iya ngagai Indonesia, betemu enggau Presiden Prabowo Subianto kena Hari Lima tu, Dato Seri Anwar madah, pekara besai ke deka dirandau sekali tu bekaul Kuasa Grid ASEAN ke bepalan di Sarawak ungkup pemaik dua buah menua nya.

“Nya alai, aku deka bala kaban ba Semenanjung, Sabah enggau Sarawak meda pengelebih enggi kitai tu iya pengulih bepun ari kaul ti manah sereta penyerakup ba Perintah Penyerakup Madani.

“Kerejasama rat perintah Besai enggau Perintah Sarawak, ke ditempa bepelasarka kaul sereta bela bebasaka pangan diri, entara Menteri Besai enggau Premier Sarawak, nyadi siti kaul ti ukai semina ngenegap penyerakup menua tang mega nyadi kunchi ba pengawa mutar macham isu ke sama ditapi,” ku iya madah baru.

Bela datai, Sapit Menteri Besai Datuk Patinggi Dr Ahmad Zahid Hamidi, Yang di-Pertua Dewan Negara Senator Dato Awang Bemee Awang Ali Basah, Menteri Besai Selangor Dato Seri Amirudin Shari, Sapit Premier Sarawak ke mega Chairman Komiti Besai Pengerami Ngintu Gawai Dayak Renggat Sarawak 2025 Datuk Amar Douglas Uggah Embas, Sapit Premier Sarawak Datuk Amar Awang Tengah Ali Hasan enggau Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, raban Menteri Kabinet Sarawak, Sapit Menteri ba Opis Premier Sarawak (Pengereja Kasar, Imigresyen enggau Matau Projek Sarawak) ke mega Chairman Komiti Pengatur Pengerami Ngintu Gawai Dayak Renggat Sarawak 2025 Datuk Gerawat Gala, raban Sapit Menteri Kabinet Sarawak, Tuai Opis Perintah sereta pemesai ke bukai. -EDISI UKAS