KUCHING: Pemutus Perintah Besai ngagihka belanja besai ungkup Sarawak lalu beberapa bengkah peminta nengah Sempekat Malaysia 1963 (MA63) dipenyadi ukai ketegal dipejal tang endang bepelasarka tanggungpengawa nyadi perintah ti enda bechiping megai genap iku rayat Malaysia.

Menteri Besai, Dato Seri Anwar Ibrahim ngenggaika penemu ari Semenanjung ti madah ke iya dipejal sereta ngemuntangka peminta Sarawak ketegal deka ngetanka penuduk diri.

Ku iya, bisi mega sekeda raban di Sarawak ngaga petenah madah ke Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg enggau bala kabinet Sarawak baka ke enda entap penemu ba randau enggau Perintah Besai.

"Sida ngaga petenah tang enda meda penerang ke amat lalu ngujungka pengirau nyadi," ku iya madah ba Pengerami Makai Lemai Hari Gawai renggat Sarawak 2025 ditu, Hari Minggu.

Nambah ke jaku iya, Dato Seri Anwar nyemetak madah, pengawa berandau ukai muntang digaga tang endang bepelasarka prinsip semua wilayah meseti mansang lalu nadai menua baikka ba mengeri tauka menua pesisir dikemelakangka alai penemu tu patut diperati enda ngira bansa tauka nengeri.

"Nya alai, ba bajet, aku madah enggau nyemetak pemutus kitai ngungkupka agih belanja ke besai ngagai bakih kitai di Sarawak lalu pia mega nengeri bepenatai pemisi mit di Semenanjung.

"Tu ukai ketegal dipejal, tang tanggungpengawa kitai ke nyadi perintah ti enda bechiping sereta nentu pengelantang semua," ku iya madah baru.

Iya mega madah, pengawa ngaga petenah ngagai bala pemesai Sarawak enda tegap penemu enda patut nyadi.

Tang ku iya, iya muji bala pemesai enggau tuai Sarawak bebendar sereta ransing ngenataika peminta enggau pengingin rayat.

"Aku nemu amat laban aku empu betuaika randau renggat kepenudi.

"Taja pia, aku nemu sida mai penemu enggau pengirau rayat ke udah lama ngasaika diri enda dikeibuh," pia ku iya. -EDISI UKAS