KUCHING: Chara Perintah Besai bepelasarka semangat federalisme enggau diri sebilik nyadi kunchi dikena mutar macham isu pemansang entara Perintah Besai enggau Perintah Sarawak.
Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, semangat kerejasama nya mujur ngenegap kaul enggau pangan diri.
Ku iya, kerejasama nyadi pelasar dikena ngatur inisiatif betikas besai ti meri empas ngagai pemansang nengeri enggau menua.
"Sebagi ari pemujur ke ulih dikemegah iya nya sempekat Penerang Begulai Petroliam Nasional Berhad (PETRONAS) enggau Petroleum Sarawak Berhad (PETROS) ti numbuh chara mutar sekeda isu strategik bekaul penatai enggau pemansang kuasa.
"Baka ke dipadah aku, enti Sarawak mansang, Malaysia mega deka mansang. Tu mih semangat kitai ba pengeransing napi ekonomi global ke enda tentu, nyengkaum penyarut politik dunya maya hari tu,” ku iya.
Iya madah munyi nya maya Pengerami Makai Lemai Ngintu Hari Gawai Renggat Sarawak 2025 ba Palan Konvensyen Borneo Kuching (BCCK) ditu, Hari Minggu tu tadi.
Yang di-Pertua Negeri Sarawak, Tun Pehin Sri Dr Wan Junaidi Tuanku Jaafar, Toh Puan Datuk Patinggi Fauziah Mohd. Sanusi enggau Menteri Besai Dato Seri Anwar Ibrahim bela datai ngulu pengerami nya.
Berebak enggau nya, Premier Sarawak nerang, Sarawak deka ngesan tanggungpengawa nyadi hab besai ba inisiatif grid kuasa ASEAN ke ngembuan tuju dikena ngenegap rentayan kuasa serantau lalu nyungkak penuduk Malaysia ba sektor kuasa.
Ku iya, Sarawak dipilih nyadi palan ngatur pengawa betemu ASEAN Senior Officials' Meeting on Energy (SOME) ti mandangka pengandal menua serantau ke pengulih nengeri tu, lebih agi bekaul Grid Kuasa ASEAN.
"Enti nadai penanggul, enggau bantu ari Asian Development Bank (ADB), projek kuasa tu ulih dipejalai lalu Sarawak deka nyadi hab kuasa ti ngangkatka penuduk Malaysia ba ASEAN bekaul ASEAN Grid," ku iya madah baru.
Sama datai, Sapit Menteri Besai Datuk Patinggi Dr Ahmad Zahid Hamidi, Yang di-Pertua Dewan Negara Senator Dato Awang Bemee Awang Ali Basah, Menteri Besai Selangor Dato Seri Amirudin Shari, Sapit Premier Sarawak ke mega Chairman Komiti Besai Pengerami Ngintu Gawai Dayak Renggat Sarawak 2025 Datuk Amar Douglas Uggah Embas, Sapit Premier Sarawak Datuk Amar Awang Tengah Ali Hasan enggau Datuk Amar Profesor Dr Sim Kui Hian, Speaker Kunsil Nengeri (DUN) Sarawak Tan Sri Datuk Amar Mohamad Asfia Awang Nasar, raban Menteri Kabinet Perintah Besai enggau Sarawak, Sapit Menteri ba Opis Premier Sarawak (Pengereja Kasar, Imigresyen enggau Matau Projek Sarawak) ke mega Chairman Komiti Pengatur Pengerami Ngintu Gawai Dayak Renggat Sarawak 2025 Datuk Gerawat Gala, raban Sapit Menteri Kabinet Sarawak, Tuai Opis Perintah sereta pemesai ke bukai. -EDISI UKAS
