KUCHING: Kerejasama rat Petroleum Sarawak Berhad (PETROS) enggau Petroliam Nasional Berhad (PETRONAS) nyadi pekara strategik dikena nentu pemansang sektor minyak enggau gas ti meruan, inklusif sereta ngangkat penuduk Sarawak enggau Malaysia.

Menteri Besai Dato Seri Anwar Ibrahim madah, taja PETRONAS udah lama ba Sarawak nengah Akta Pemansang Petroleum 1974 (PDA74), iya andal Sarawak diatu udah majak mansang sereta ulih ngatur penatai pengeraja asal diri empu.

"Diatu Sarawak udah bisi penemu enggau pengulih, lalu udah maya iya, sida ngatur kompeni diri empu baka PETROS. Tu enda ulih dikeenggai kitai," ku iya.

Iya bejaku munyi nya maya Pengerami Makai Lemai Hari Gawai Renggat Sarawak 2025 ditu, Hari Minggu tu tadi.

Nambah ke jaku iya, Menteri Besai nya madah, Malaysia diatu ukai baka Malaysia taun 1970-an tauka 80-an suba alai rebak baru Sarawak diatu mayuh ngembuan pengulih enggau penemu nyengkaum kala gawa ba kompeni besai baka PETRONAS enggau Shell.

Ku iya, endang patut meri awak ngagai PETROS ngatur pengawa bekaul gas di Sarawak.

"Kerejasama tu bela mai pemaik ngagai semua taja randau bekaul endang lama diatur laban bisi pekara besai patut dirunding ke endang udah lama bisi digaga," ku iya madah baru.

Iya mega enggai menua enggau rayat berasai enda lantang tauka rugi lalu pia mega enggai meda rayat Sarawak dikemelakangka.

"Ketegal nya, aku enggau Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah nyain Penerang Begulai bekaul pemansang ba industri minyak enggau gas ti begunaka saup PETRONAS ungkup Malaysia lalu PETROS ungkup Sarawak.

"Nya alai, kitai nerima pekara tu, sama saum singkang ngangkat penuduk Sarawak enggau menua," ku iya nyemetak madah. -EDISI UKAS