KUCHING: Bisi 14 palan di Sarawak udah digazet nyadi palan pesaka, senutuk enggau pengawa perintah nengeri ransing nyaga sejarah enggau daya idup menua tu.

Menteri Dagang Temuai, Industri Kreatif enggau Seni Pemerindang Sarawak, Dato Sri Abdul Karim Rahman Hamzah madah, palan ke udah digazet tu nyengkaum Rumah Panjai Melanau di Kampung Sok (Matu), Rumah Sri Tanjung di Tanjung Lobang (Miri), Gereja Sacred Heart di Sungai Bawan (Kanowit), Kubur Dato Permaisuri (Miri) enggau Pendam Ali Wallace di Kampung Jaie (Sadong Jaya) .

Bela dirintai, iya nya, Kubur Shariff Skrang, Kampung Igan, Palan Masjid Bandaraya Kuching, Palan Betempuh Beting Maru, Lombong Arang Batu Brooke (Simunjan), Batu Ritung Pa’lungan (Bario), Palan Betempuh Kampung Jakar di Biawak (Lundu), Batu Tuang Semebak, Batu Swiss Belipat (Demak) sereta Palan Kapal Soldadu Jepun Sangkai di Pantai Brighton.

“Mayuh agi palan udah dipeda enggau benung ditisih, sekali ke palan nya ngembuan tikas pesaka sereta tau digazet ke enda,” ku iya ba aum media pengudah ngulu Aum Ninting Taun Kaunsil Pesaka Sarawak 2025 ti betuai ke iya, ditu, kena Hari Tiga tu tadi.

Nitih ku Dato Sri Abdul Karim, pengawa Kaunsil Pesaka Sarawak ke bukai iya nya meri penemu ngagai perintah senentang singkang dikena nyaga sereta ngelangkar tunga kuing strategik ba pengawa nyaga reta berega nengeri.

Ba pekara bukai, iya mega madah ke Muzium Budaya Borneo udah ngerikod 117,095 orang datai ari Januari ngagai 16 Jun taun tu, alai semua penyampau ke udah datai kenyau muzium nya dibuka kena 2022 bisi 1,354,275 iku.

Sama datai Sapit Menteri Dagang Temuai, Industri Kreatif enggau Seni Pemerindang Sarawak, Datuk Snowdan Lawan enggau Datuk Sebastian Ting Chew Yew.-EDISI UKAS