KUCHING: Perintah Sarawak merambu deka nganjung nama dipilih nyadi tuai rumah ngatur World Robotics Olympiad (WRO), pekit robotik tebilang renggat antarabansa ba tuju nempa nengeri tu nyadi palan penyulut pengelandik digital enggau inovasyen serantau.

Menteri Pelajar, Inovasyen enggau Pemansang Penau (MEITD), Dato Sri Roland Sagah Wee Inn madah, singkang tu sebagi ari inisiatif timpuh panjai Sarawak ngenegap ekosistem teknologi sereta matak pengelandik biak ari selampur dunya.

“Kitai deka mai penemu biak ke pemadu manah ngagai Sarawak lalu ngayanka nengeri tu ke benung mansang nyadi palan pengelandik digital enggau inovasyen,” ku iya madah maya bejadika Program Nyua Kit Robotik serimbai National Robotic Competition (NRC) di LCDA Tower, The Isthmus, kena Hari Tiga tu tadi.

Dikena ngepun ke sukung, opis menteri iya udah ngemendar geran sepenyampau RM666,000 ungkup pengawa ngenegap inisiatif robotic, nyengkaum pekit sereta pemansang program pelajar ba sekula selampur nengeri.

Program nyua kit nya udah nyadi sebagi ari program ninting taun opis menteri nya - STEM Trailblazers Sarawak – ke disua ari zon utara, tengah nyentuk ke selatan nengeri dikena nambah ke tikas pengerindu ati nembiak ba sains enggau teknologi.

Nerang silik, Dato Sri Roland madah Sarawak mega deka nyendiaka program pra-ijazah enggau ijazah bepelasarka STEM di universiti enggi nengeri tu berengkah 2026, nyadi sebagi ari pelin pemansang modal mensia digital.

“Kitai deka nembiak baru kitai besedia enggau dunya digital. Semua kus deka ngemerat pekara STEM,” ku iya nerang.

Iya mega ngemeratka chara pelajar bepelasarka teknologi enda semina ngadaka injinir enggau saintis, tang besai reti dikena nempa orang gawa dudi hari ke bepengelandik tinggi, landik ngena teknologi sereta ulih besemekih ba renggat global.

“Menua baka Jerman, Australia enggau Korea Selatan mujur laban sida iya ngemeratka pelajar teknikal.
"Kitai mega deka meda pekara sama nyadi di Sarawak,” ku iya madah baru.-EDISI UKAS