KUALA RAJANG: Kandang menua Sebayang enggau Tusok di DUN Kuala Rajang diperati bisi pengulih besai dikemansangka nyadi siti hab tibang beras di Sarawak.

Tu dipelaba ulih dijapai nengah pejalai projek ngaga ban tauka selapat nagang ai masin ke beungkus semak RM400 juta.

Sapit Menteri Perambu Mengeri, Pengatur Tanah enggau Rampa Sarawak Datuk Len Talif Salleh madah, projek nya ukai semina ulih nambah asil beras menua, tang nyadi penatai pemisi baru ngagai peranak menua.

“Projek Ban tu ke beungkus semak RM400 juta ukai semina ulih mutar penanggul ai masin ke ngeruga pengawa betanam betupi, tang mai pengulih ngagai kandang menua Sebayang enggau Tusok ke ulih alai bumai bedandang,” ku iya.

Iya madah munyi nya maya bejaku ba Pengerami Ngiling Bidai DUN Kuala Rajang di Dewan Bala Mayuh Sebayang, kena Hari Dua tu tadi.

Kaban Kunsil Nengeri (ADUN) Kuala Rajang nya mega madah, pejalai projek tu begunaka kerejasama rat ari semua ke bekaul dikena nentuka polisi perintah ulih dikemujur.

Sama datai, Kaban Parlimen Tanjung Manis Ir Yusuf Abdul Wahab. -EDISI UKAS