BALEH: Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ngatur penemuai gawa ngagai palan projek Tekat Ai Hidroelektrik Baleh dikena meresa pemansang siti ari projek kuasa ulih dikena baru nengeri tu.

Premier Sarawak datai ba palan projek urung pukul 11 pagi disempulang Menteri Utiliti enggau Telekomunikasyen Sarawak, Dato Sri Julaihi Narawi sereta Sekretari Perintah Sarawak, Datuk Amar Mohammad Abu Bakar Marzuki.

Sama datai, Menteri Kereja Raya, Dato Sri Alexander Nanta Linggi, Sapit Menteri Digital Malaysia, Datuk Wilson Ugak Kumbong, Sapit Menteri ba Opis Premier Sarawak (Undang-Undang enggau Adat Bumiputera), Datuk Jefferson Jamit Unyat, Sapit Menteri Utiliti (Sarawak Energy enggau PETROS) ke mega Chairman Sarawak Energy, Dato Ibrahim Baki, Kaban Kunsil Nengeri (ADUN) Katibas, Lidam Assan enggau Residen Bagi Menua Kapit, Elvis Didit.

Penatai sida disambut Tuai Pegawai Eksekutif Sarawak Energy Group, Datuk Sharbini Suhaili, Mandal Presiden Eksekutif (Penyampian Projek) Sarawak Energy, Ir. Pramod Kumar Karunakaran, raban pengari agensi perintah enggau Sarawak Energy Berhad.

Nangkan nya, sida dibai ngabas palan projek ngaga tekat ai dikena ngulihka penerang silik senentang status pemansang projek ke disadang nyaup nipak guna kuasa timpuh panjai nengeri sereta nyaup inisiatif ekonomi gadung Sarawak.

Projek Tekat Ai Hidroelektrik Baleh siti komponen besai ba pelin strategik Sarawak Energy dikena nambah kapasiti ngasilka kuasa ulih dikena baru, setipak enggau juluk ati nempa Sarawak nyadi pengeluar kuasa meruan besai di Asia Tenggara.-EDISI UKAS