KUCHING: Bisi 55,457 penerima ba selampur menua udah nerima bantu pengelantang sepenyampau RM123.78 juta nengah sistem eBantuanJKM naka Mei 2025.

Menteri Pemansang Indu, Ruang Bilik enggau Mensia Mayuh, Dato’ Sri Nancy Shukri madah, ari penyampau nya, 45,509 penerima nerima bantu ari baruh Perintah Besai enggau penyampau semua RM108.19 juta, lalu 9,948 penerima di Sarawak nerima bantu penyampau RM15.60 juta.

Nitih ku iya, sistem eBantuanJKM ke udah dikena kenyau 15 taun deka diterit dikena nyeliah salah guna lalu nentuka bantu diagih ngagai sida ke patut.

“Suba bisi ke beambi ulih laban sistem enda entu terit, tang diatu peluang nya endang nadai. Sistem tu efisyen lalu kitai andal nya deka dikerembai,” ku iya.

Iya madah munyi nya ngagai pemberita pengudah bejadika pengawa bekenaka sistem eBantuanJKM, ditu. Hari Lima.
Iya madah, Sarawak sebedau tu ngena sistem kediri, tang pengawa nyeraris entara Perintah Nengeri enggau Perintah Besai diatu benung chakah enggau juluk nyapai sistem ti begempung manggai taun 2026.

Dato’ Sri Nancy bela ngemerat tanggungpengawa JKKK enggau NGO nyaup ngerembaika penerang sereta marit individu ti patut nerima bantu ngagai Opis Pengintu Pengelantang Mensia Mayuh Pelilih (PKMD).

“Aku mega ngingatka bala pegawai pengintu pengelantang ambi ke enda ngenusahka rayat. Kemuntangka pengawa sida ambi ke sida enda takut datai minta tulung,” ku iya.

Sama datai, Tuai Direktor Pengintu Pengelantang Mensia Mayuh, Datuk Che Murad Sayang Ramjan, Direktor JKM Sarawak, Semawi Mohamad sereta Sekretari Mendam Opis Menteri Pemansang Indu, Nembiak Mit enggau Pengelantang Komuniti Sarawak, Datu Felicia Tan Ya Hua.–EDISI UKAS