BINTANGOR: Pejalai projek Program Transformasyen Menua Pesisir (RTP) nyeleti Stadium Bola Keranjang Bintangor digaga nitih spesifikasyen ti udah ditetap sereta nyapai tikas kualiti ti ngemantupka ati.

Perkara nya dipadah Kaban Kunsil Nengeri (ADUN) Meradong, Datuk Ding Kuong Hiing, pengudah ngabas pejalai projek nya ba penemuai gawa ngagai taba projek, kena Hari Empat tu tadi.

“Aku tepantup ati meda pejalai projek tu. Bala kontraktor ke dichiri ari sistem chabut undi udah bejalaika pengawa sida enggau manah sereta nitih spesifikasyen udah ditetap,” ku iya.

Datuk Ding mega madah, projek dipejalai berenggat kenyau taun 2020 nya kelai pengeransing Perintah Sarawak nambah perengkaguna menua pesisir, lebih agi ba pengawa lumba enggau main.

Empat renggat projek udah dipejalai enggau kesemua belanja manggai RM3.4 juta, renggat keterubah enggau kedua bela beungkus RM1 juta ba taun 2020 enggau 2021, dientudi RM800,000 ungkup Renggat Ketiga ba taun 2022, enggau Renggat Keempat ba taun 2024 ke beungkus RM600,000.

Renggat ke diatu iya nya renggat keempat mungkur pengawa nyeleti infrastruktur baka pengawa ngaga endur duduk, agu sereta nyendia sistem bekal karan, dikena ngenapka fasiliti stadium ke bisi.

Sama datai, Chairman Gerempung Netbol Bintangor, Gung Chiu Kion, Penolong Injinir Awam Kaunsil Pelilih Meradong enggau Julau (MDMJ), Molica, Pemancha Yii Hee Sieng, Kapitan Lee Koh Ung, sereta bala kaban Serakup Bola Keranjang Bintangor.-EDISI UKAS