KUCHING: Bisi tiga projek ari baruh sektor dagang temuai enggau rampa menua ti dipelaba beungkus sepenyampau RM27.4 juta udah diperambu dipejalaika ba sitak Kunsil Nengeri (DUN) Kabong.

Kaban Kunsil Nengeri (ADUN) Kabong ke mega Chairman Komiti Sektor Dagang Temuai enggau Rampa Menua Agensi Pemansang Bagi Menua Betong (BDDA), Dato Mohd Chee Kadir madah, ketetiga projek nya sebagi ari 11 projek ke dirandau ba Aum Komiti Sektor Dagang Temuai enggau Rampa Menua BDDA Bil. 2/2025 ti betuai ke iya ba Baitulmakmur II, Petra Jaya ditu, kena Hari Empat tu tadi.

“Tiga projek besai ke dilanggur ba DUN Kabong tu, iya nya Nyeleti Fasiliti di Pantai Tanjung Kembang ke beungkus RM10 juta, Langgur Ngaga Foodcourt enggau Homestay ba alai ti sama enggau langgur ungkus RM15.9 juta, sereta Nyeleti Perengkaguna Tebing Ai Seblak beungkus RM1.5 juta,” ku iya.

Iya mega madah ke projek nya diatu agi ba renggat perambu (Dpr) lalu nya sebagi ari inisiatif Perintah Sarawak nengah BDDA dikena ngenegap sektor dagang temuai menua pesisir enggau meruan sereta inklusif.

Dato Mohd Chee mega meri perati pemesai guna kerejasama enggau pengeransing tegut ari semua agensi ke bekaul dikena nentuka pejalai projek mujur digaga nitihke taga.

“Kitai dekaka rayat jampat ngasai pengelantang. Nya kebuah aku ngarap ke tetiap raban ti dikaul ulih gawa manah ngambi projek tu mujur lalu komuniti berasai lantang,” ku iya. EDISI UKAS