KUCHING: Projek Jematan Sejingkat diatu udah digaga 52.45 peratus enti dibanding enggau langgur projek 59.75 peratus.

Sapit Menteri Infrastruktur enggau Pemansang Penyangkai Kapal Sarawak, Datuk Ir Aidel Lariwoo madah, pengelaun urung 7.3 peratus nya ketegal sekeda pekara bekaul teknikal, lebih agi baka pengawa ngena ‘form traveller’ enggau perengka bukai ke dikena ngaga jematan.

Ku iya, nitih ke kontrak ke udah diperesa baru, projek tu dipelaba deka tembu bulan Februari 2026, tang ketegal pengelaun nya, kontraktor madah ke projek nya ulih tembu sebedau Jun 2026.

Iya nerang munyi nya ba aum media maya ngabas projek nya ditu, Hari Tiga.

Nambah ke jaku iya, Datuk Ir Aidel madah, kontraktor benung mutarka pekara nya, nyengkaum meli dua set ‘form traveller’ ari menua China dikena ngerumban pengawa ngaga jematan nya.

Jematan 1.28 kilometer (km) pemanjai enggau 26 meter peninggi enggau tiang 119 meter peninggi nya beungkus RM360 juta.

Sama datai, Sapit Menteri Kuasa enggau Pemeruan Rampa Menua ke mega Kaban Kunsil Nengeri (ADUN) Demak Laut, Datuk Dr Hazland Abang Hipni. -EDISI UKAS