BINTANGOR: Pengawa ngaga Projek Transformasyen Menua Peisisir (RTP) ba sitak DUN Meradong patut dirumban ketegal ngira pengelantang rayat dia.

Kaban Kunsil Nengeri (ADUN) Meradong, Datuk Ding Kuong Hiing nyemetak madah munyi nya maya ngulu program Randau Begulai Enggau Agensi Ngaga Projek RTP ti betuai ke iya, ke diatur ba Palan Servis DUN Meradong ditu, kena Hari Satu tu tadi.

Tuju randau nya dikena mansik pejalai pengawa ngaga projek sereta nyidi pekara ti ngasuh projek nya laun tembu.

Program nya digulu pengari ari agensi perintah nyengkaum Residen Sarikei, Opis Kereja Raya (JKR), Opis Bekal Ai Menua Pesisir (JBALB), Kaunsil Pelilih Meradong enggau Julau (MDMJ), Opis Tanah enggau Survei, Opis Sungai-Sungai Sarawak sereta agensi ke bukai.

Datuk Ding madah, pengawa nyabut undi patut digaga jampat agi ngambi ke enda laun ngepunka projek nambah ke diatu udah tengan taun.

Iya nesau semua agensi nentuka pengawa dipejalai nitih spesifikasyen sereta langgur ke udah ditetap.

“Rayat nganti asil pemansang tu. Enti projek tu laun tembu, pemaik ari nya mega tejanggal. Tu ukai semina projek pemansang, tang bela ngira pengelantang rayat,” ku iya.

Maya nya iya mega berati penanggul bekal ai ti suah nyadi di Batu 5, Jalai KJD Bintangor.

Pengari JBALB Bagi Menua Sarikei, Ling Kah Wei nerang sereta madah pengawa bekaul benung diatur.-EDISI UKAS