SHANGHAI: Pengeransing Sarawak deka nyadi menua nyulut ba kuasa ulih dikena baru di randau tu majak disungkak nengah pengawa nyain Sempekat Pemereti Ati (MoU) begulai enggau China Three Gorges International Ltd (CTGI) enggau Shanghai Electric Power T&D Group Co. Ltd.
Pengawa nyain MoU nya diatur maya Konferens Fotovoltaik Solar enggau Kuasa Pintar Antarabansa 2025 (SNEC PV) Ke-18 di Shanghai, China, Hari Dua.
Bepun ari kerejasama nya, Perintah Sarawak nengah Opis Menteri Utiliti enggau Telekomunikesyen, CTGI enggau Shanghai Electric deka besaup ngaga pansik sereta kerejasama nyerungkai pengulih ngaga solar melepu enggau kapasiti enda lebih ari 1,000 Megawatt (MW) ba Loji Hidroelektrik (HEP) Bakun.
MoU nya disain Sekretari Mendam MUT, Datu Jafri Lias, Mandal Presiden CTGI, Zhang Kai Hong enggau Mandal Presiden Shanghai Electric, Yang Xing Hai.
Pengawa nya dikemata Sapit Menteri Utiliti (Sarawak Energy Berhad enggau Petros), Dato Ibrahim Baki ti ngari ke Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg.
Dato Ibrahim maya macha teks jaku Premier Sarawak madah, Sarawak temegah ati ulih nempa kerejasama strategik nya ti bela nyukung juluk ati nengeri nentuka pengelikun kuasa enggau rampa menua.
"Sarawak diatu ulih ngasilka kuasa urung 5,900MW ti tebal agi ari tekat ai.
"Manggai taun 2030, Sarawak bisi juluk ati ngasilka 10GW enggau 15GW ba taun 2035.
"Ari pun penatai kuasa ke mayuh, Sarawak ngembuan pengelebih nyadi menua ke nyulut ba kuasa ulih dikena baru ba rantau tu," ku iya madah.
Iya ke mega Chairman SEB madah, Sarawak bela ngasilka kuasa karan ari solar ke digaga betikas besai ti keterubah iya ba HEP Batang Ai kena Disember 2024 suba.
Iya madah, inisiatif nya bela deka ngepunka pengawa ke sebaka digaga ba menua bukai di Sarawak. -EDISI UKAS
