SARIKEI: Projek jalai enggau Jematan Batang Rajang ti nyambung Sarikei ngagai Tanjung Manis diatu udah tembu lalu berengkah dibuka ngagai mensia mayuh seraya nyadi penyungkak pemansang ekonomi ngelingi nya.

Sapit Menteri Pengeraja Asal enggau Pemeruan Rampa Menua ti mega Kaban Parlimen Sarikei, Dato’ Sri Huang Tiong Sii madah, projek beungkus RM300 juta nya siti pemujur besai ti deka ngerumban pemansang ekonomi sereta ngemuntang penyambung entara komuniti.

“Jematan tu ukai semina ngemandak timpuh pejalai tang mega ngerandang peluang baru ba sektor meranak puku, dagang temuai enggau dagang.

“Tu nunjukka perintah keran ngemansang sitak menua pesisir,” ku iya maya bejaku ba Pengawa Nyuaka Chek Projek Mit Pemansang Menua Pesisir (MRP) di Palan Servis Pengari Rayat, empai lama.

Ba pengawa nya, bisi 70 iku datai nyengkaum pengari ari bemacham organisasyen enggau komuniti lokal.

Bisi 50 gerempung nerima chek nengah inisiatif MRP nyerangkkung sekula, NGO, gerempung main asal, jalai pengarap enggau lumba.

Kaban Kunsil Nengeri (ADUN) Repok nya nyemetak madah, kenyau ari nyadi pengari rayat, iya keran mai pemansang infrastruktur nyengkaum nyeleti jalai ba sitak menua pesisir enggau nyendiaka perengkaguna pemun ngagai rayat.

Pia mega, iya meri terima kasih ngagai Premier Sarawak laban udah meri kerejasama nentuka projek pemansang lanchar di Sarikei enggau Meradong.

Pengawa nyuaka chek nya lambang pengeran perintah mekuh kaul entara tuai enggau rayat sereta nentuka pemansang datai ngagai renggat baruh.

Sama datai iya nya Chairman Kaunsil Pelilih Sarikei, Wong Kie Yong; Temenggong Lau Hieng Ming, Pemancha Chan Phan Chan, Penghulu Huang Tiong Kang sereta Kapitan Ling Dien Yong.-EDISI UKAS