KUCHING: Sarawak terus negapka komuniti bengal nengah chara inklusif kenyau ari biak nyengkaum ngatur program pelajar jaku isyarat di Tadika Sedidik ba selampur nengeri.

Menteri Pemansang Indu, Nembiak Mit enggau Pengelantang Komuniti, Dato Sri Fatimah Abdullah madah, semua nembiak enggau pengajar tadika nengah opis menteri diatu dilatih ngena jaku isyarat nyengkaum nyadaka lagu kebangsaan enggau nengeri dalam jaku isyarat.

“Inisiatif tu beguna amat narak penyedar pasal budaya enggau komuniti bengal entara rebak biak,” ku iya bejaku bejadika SOPMA Baton Run 2025 diatur Gerempung Orang Bengal Sarawak (SDDA) di Dataran MBKS, ditu kena Hari Minggu.

Ku iya, program baka tu ulih ngenyemakka diri enggau mensia mayuh sereta komuniti bengal ti agi kurang dikelala sekeda orang.

Nambah ke nya, iya mega muji inisiatif peranak Kuching pasal pengawa Belanda ti ngerikod penatai ngelui selinting tumu beribu penyereta.

“Timbal tu chukup manah. Tabi puji ngagai komiti pengatur ke pemujur ngatur pengawa belanda baton tu berengkah ari Miri, Bintulu, Sibu enggau diatu di Kuching,” ku iya.

Iya mega ngelalau bala penyereta nyadi duta mit ngagai komuniti bengal enggau ngerembai penerang pasal sukung sereta fasiliti ke bisi diatu di Sarawak nyengkaum akses ngelala tumu penanggul ninga ba hospital enggau palan OSIK sereta numbuhka sekula khas ungkup nembiak bengal ba renggat sekula primari enggau sekula sekondari.

Ku iya agi, Sarawak mega deka nyadi tuai rumah pekit lumba bengal renggat nasional bulan Oktober tu lalu iya ngelalau volunteer ngambi bagi enggau meri sukung.

“Nadai sapa deka dikelaung enggau diteju,” ku iya ngujungka jaku enggau penuh semangat.

Sama datai, Datuk Bandar MBKS, Dato Wee Hong Seng; Sapit Direktor Opis Pengelantang Komuniti (JKMS) Renggat Sarawak, Norhayati Abdul Rahman; Sapit Direktor JKMS Renggat Besai, Mohd Ali Taib; Chairman Gerempung Lumba Orang Bengal Sarawak, Ko Ming Liang; sereta Chairman Komiti Pengatur SOPMA Baton Run 2025, Victor Hii Lik Nguong.-EDISI UKAS