PADAWAN: Pengawa nutup Pengerami Gawai Dayak 2025 di Kampung Biya Assum diatur enggau penuh adat sereta tradisyen pengudah dipenyadi nengah simbolik “merun kasah” tauka ngiling tikai wi kelai abis musin Gawai ungkup komuniti Bidayuh Biya ba sitak nya.

Pengerami ti diatur di Balai Mayuh Guna Kampung Biya Assum kena Hari Enam nya diatur Kelab Nembiak enggau Rekreasyen sereta JKKK Kampung Biya Assum sereta digulu lebih 200 peranak genturung pendiau.

Pengerami nya mega richah enggau bemacham pemerindang main asal ti mandangka penyelai pesaka komuniti Bidayuh.

Temuai dipebasa, Sapit Menteri Pengangkut Sarawak (Langit enggau Darat) ti mega Kaban Kunsil Nengeri (ADUN) Mambong, Datuk Dr. Jerip Susil mega datai bejadika pengawa nutup nya.

Maya bejaku, iya nyemetak madah ke pemesai reti nyaga adat asal baka merun kasah nyadi lambang basa ngagai pesaka aki ini kitai kelia.

“Tradisyen baka tu ukai semina simbolik tang mega nyeremin reti budaya ti dalam enggau patut terus ditan sereta diajar ngagai rebak biak,” ku iya.

Ku iya, pengerami Gawai tu ukai semina nyadi pengerami main asal tang mega bisi pengulih nyadi pelasar ngelaku adat enggau gaya idup komuniti Bidayuh ngagai komuniti luar.

Tambah mega, iya merambu pengerami Gawai ba sitak DUN Mambong diatu begintir belabuh taun 2026 dikena ngayanka bemacham suku Bidayuh ngagai temuai sereta rayat.

Pengerami merun kasah ti dipejalai nya nyadi penutup Gawai, ukai semina ngelai abis musin ngetau tang mega dikena ngempung komuniti ba semangat begulai enggau basa ngagai adat asal ti ditampung ari kelia.

Pengerami nya mega digulu Penulung Pegawai Atur Pengawa Opis Pelilih Mit Padawan, Paul Mathieus Akin; Tuai Raban Bansa Kampung Biya Assum, K.K Siang Sayod; enggau Penghulu Bidayuh Sitak Annah Biya, Penghulu Dorong Kabut. - EDISI UKAS