LIMBANG: Projek nyeleti Tebing Sungai Limbang Renggat Satu ti diatu benung ranchak enggau lanchar dipejalai.

Sapit Menteri Industri Pemakai, Komoditi enggau Pemansang Kandang Menua Sarawak, Datuk Dr Abdul Rahman Ismail madah, projek nya ti sekeda udah tusur enggau meseti digaga langkar tengkebang baru diatu udah tembu 30 peratus.

“Nitih ke penerang, projek nya udah digaga ngelui 1 peratus ari taga asal.

“Projek ti beungkus RM9.5 juta disadang tembu ujung taun,” ku iya maya dirandau pemberita pengudah ngabas Taba Perambu Projek Jalai KeTaman Tasik Bukit Mas Limbang enggau Taba Projek Nyeleti Sungai Limbang Renggat Satu (Endur Ti Tusur), kena Hari Lima.

Ngenang silik, iya madah ke siti da projek nya sitak nya baka ngaga endur perau sangkai beungkus RM5 juta ti diatu ba proses meri pemendar kepenudi ari Komiti Langkar Tengkebang Begunan Nengeri tauka State Building Design Committee (SBDC).

“Kitai ngarapka projek tu ulih berengkah dipejalai taun tu lalu ulih tembu tengan taun baru laban kitai meramb nengah Komiti Pengerami Besai Bagi Menua Limbang deka ngidupka baru Pengerami Limbang taun baru, dalam bulan Julai ngagai September.

“Kitai minta projek ti bekaul enggau tebing sungai tu ulih tembu sebedau tengan taun baru,” ku iya.

Datuk Dr Abdul Rahman mega nyebut pasal Projek Jematan Sungai Limbang Kedua ti disadang tembu kena Disember 2025, baka dipadah Sapit Premier Sarawak ti mega Menteri Infrastruktur enggau Pemnasang Penyangkai Kapal Sarawak, Datuk Amar Douglas Uggah Embas ba Aum Kunsil Nengeri, empai lama.

“Nya kebuah, kitai ngarapka nengah penembu fasiliti baka tu, insyallah aktiviti sosioekonomi di Limbang deka betambah manah.

“Kitai andal ke Limbang ulih nyungkak ekonomi Sarawak,” ku iya.

Nambah ke nya, iya mega nyebut pasal Projek Jalai Akses ke Taman Tasik Bukit Mas ti apin berengkah dipejalai lalu dikena nukar jalai ke bisi diatu ti enda likun agi sereta udah ngasuh penusah aksiden nyadi.

“Kitai udah minta ngagai Premier Sarawak Datuk Patinggi Tan Sri (Dr) Abang Abdul Rahman Zohari Tun Datuk Abang Openg lalu iya dah ngemendar agih belanja penyampau RM22 juta dikena ngaga jalai nya.

“Projek nya diatu ba renggat kepenudi ditinda lalu disadang deka ditinda taun tu mega,” terang iya.

Sama datai iya nya Residen Bagi Menua Limbang Unus Tambi, Injinir Unit JKR Bagi Menua Limbang Mahathir Jokeni, enggau pengari Penguasa Opis Tanah & Survei Bagi Menua Limbang Bujang Radin.-EDISI UKAS