PADAWAN: Penyanggup peranak Kampung Pain Bojong enggau genturung bukai pindah ari tanah asal sida ungkup pemansang Sarawak kelebih agi nyamin bekal ai ngagai Mengeri Kuching enggau sitak ngelingi dikenang.

Sapit Menteri Pengangkut Sarawak (Langit enggau Darat) Datuk Dr Jerip Susil nyemetak madah, pengawa mindahka genturung ngagai Skim Pengentap Baru Bengoh (BRS) nya siti pemutus besai nentuka pengawa ngaga Tekat Ai Bengoh ti nyadi pemansut besai bekal ai ungkup Kuching enggau sitak ngelingi nya.

“Pengawa mindahka Kampung Pain Bojong enggau genturung bkai ba taun 2014 nya inisiatif besai ungkup bekal ai meruan di mengeri Kuching nengah pengawa ngaga Tekat Ai Bengoh.

“Lebih 700 ruang bilik ngambi bagi nengah ungkus pengentap baru manggai RM400 juta nyengkaum nyungkur taba enggau pemansang fasiliti ti genap,” ku iya bejaku ba Pengawa Nyuaka Setipikit Tuai Raban Bansa Kampung Pain Bojong enggau Pengerami Gawai Dayak 2025, ditu empai lama.

Diatu, sitak BRS udah mansang lalu disikap bemacham fasiliti moden baka genturung ti lantang, jalai, bekal ai enggau kuasa karan sereta tanah endur betanam betupi.

Pelajar mega dikemerat nengah pemisi Sekula Primari (SK) Taba Sait ti meri pemaik ngagai anak ari sekeda genturung pendiau.

Ba pengerami sebaka, Rijau Among dipilih nyadi Tai Raban Bansa baru Kampung Pain Bojong kelai nampung legasi tuai renggat baruh ti tegap dikena nyukung pemansang komuniti.

Datuk Dr Jerip ti mega Kaban Kunsil Nengeri (ADUN) Mambong mega ngemendar agih belanja RM200,000 dikena nyeleti Balai Kampung Semban enggau Pain Bojong sereta belanja tambah RM30,000 ungkup bejalaika projek sebaka ba Renggat Ketiga tauka Keempat ila.

Sama datai, Pegawai Menguasa Opis Pelilih Mit Padawan, Julius Scott Sapong; enggau Penulung Pegawai Atur Pengawa Opis Pelilih Mit Padawan, Paul Mathieus Akin. -EDISI UKAS