LIMBANG: Begunan lama Sekula Sekondari (SMK) Limbang ti enda dikena deka diseleti nyadi Palan Pom Enam Limbang enggau palan kedua di Sarawak.

Sapit Premier Sarawak, Datuk Amar Awang Tengah Ali Hasan madah, projek nyeleti nya udah diberi agih belanja RM4.5 juta ti udah diagih ngagai Kaunsil Pemansang Koridor Kandang Menua (RECODA).

Ku iya, pelin projek udah digaga Opis Kereja Raya (JKR) lalu JKR dipilih nyadi agensi pengatur nentuka projek nya lanchar.

“JKR udah nyerenih enggau tetemu ke struktur begunan agi tegap tang mayuh pekara meseti diseleti.

“Aku deka projek tu dirumban enggau nitih ke penerang ari raban JKR, projek tu disadang tembu dalam timpuh lapan bulan,” ku iya pengudah ngabas taba projek di SMK Limbang, kena Hari Lima.

Kaban Kunsil Nengeri (ADUN) Bukit Sari nya nyemetak madah, pengawa ngemendar pelin begunan enda ibuh dibai ngagai renggat nengeri tang ulih diputus ba renggat bagi menua dikena ngerumban pejalai projek.

“Enti pelin tu udah disukung Opis Pelajar, tinda ulih dipejalai lengkas. Aku deka projek tu dipejalai lengkas.

“Aku ngasai ke pelin tu enda ibuh datai ngagai renggat nengeri, ba renggat bagi menua pen ulih ngaga pemutus. Aku deka pojek tu dipejalai lengkas,” ku iya.

Entara struktur tu nyengkaum nyeleti sekula nya baka tiga blok akademik, siti blok opis enggau siti blok buding.

Skop kereja nya baka nukar perabung, ngelekat siling baru, ngechat, nyambung tali karan baru, nambahka agu sereta nyendiaka jemari ungkup blok akademik, opis, kantin enggau buding.

Sebedau tu, Agensi Pemansang Kandang Menua Utara (NRDA) udah ngaga sekeda fasiliti ba taba sebaka nyengkaum blok buding lelaki enggau indu sereta kantin/dewan makai.

Projek beungkus RM4.5 juta ti dipelanja Perintah Sarawak tu dikena negapka pelajar prauniversiti di Limbang nengah pengawa nyendiaka fasiliti moden enggau lantang ungkup nembiak.

Pejalai ngabas nya mega disempulang Sapit Menteri Industri Pemakai, Komoditi enggau Pemansang Kandang Menua Sarawak ti mega ADUN Bukit Kota, Datuk Dr Abdul Rahman Ismail, Residen Bagi Menua Limbang, Unus Tambi, Injinir Unit JKR Limbang, Mahathir Jokeni, Pegawai Pelajar Pelilih Limbang, Matzinan Wahit, Injinir Opis Parit enggau Entali Ai Limbang, Iwan Halmi, pengari Direktor NRDA, Wesley Rimai sereta pengari Opis Tanah enggau Survei Limbang, Bujang Radin. – EDISI UKAS