UNITED KINGDOM: Sarawak negapka penuduk nyadi pengemudi kuasa beresi di Asia Tenggara nengah pengeran nyadi pengeksport kuasa baruh karbon betikas global dikena ngulu Kongres Eksport Kuasa (EEC) 2025 di Aberdeen, United Kingdom.
Sapit Menteri Kuasa enggau Pemeruan Rampa Menua, Datuk Dr. Hazland Abang Hipni madah, Sarawak ba luan nengah idar kuasa beresi ASEAN asil gempung polisi tegap, pengawa meranak puku strategik dalam inovasyen sereta kerejasama serantau enggau antarabansa.
“Sarawak ukai semina ngemansang kuasa beresi ungkup dikena diri empu, tang sedia nyadi pemekal besai kuasa beresi ngagai rantau enggau dunya. Kami deka dikelala nyadi ‘Bateri ASEAN’,” ku iya.
Ku iya nengah penerang media kena Hari Empat, Sarawak udah bejalaika strategi kuasa ti bepelasarka empat batang pekara iya nya kuasa ulih dikena baru, gas asli, nangkap enggau nyimpan karbon (CCS) sereta hidrogen ti dikemansang dikena nyamin pemansang meruan enggau semekih serantau.
Diatu, ku iya, lebih 70 peratus kuasa karan Sarawak dipansut ari hidroelektrik nengah pelin nambahka kapasiti kuasa ulih dikena baru manggai 2030 enggau 2035.
Sarawak mega ba renggat ngerembai eksport kuasa ngagai Singapura pengudah pemujur nganjung kuasa ngagai Kalimantan Barat, Brunei enggau Sabah, ku iya agi.
Nambah ke nya, Sapit Sekretari Perintah Sarawak (Perambu Ekonomi enggau Pemansang), Dato Sri Dr. Muhammad Abdullah Zaidi mega ngangkatka pelasar EEC nyadi pelasar besai matak pemeranak puku antarabansa.
“Sarawak sedia meranak puku. Kami mai pesan nyata senentang nengeri tu sedia nyadi hab besai eksport kuasa beresi, ukai semina ungkup ASEAN tang mega ngagai serata dunya,” ku iya.
Sarawak Energy Berhad, ku iya mega ngayanka pelin integrasyen grid ngelui adan menua enggau agenda pemeruan timpuh panjai seraya SEDC Energy mandangka kerejasama enggau Jepun sereta Korea Selatan ba pemansang eksport hidrogen enggau ammonia.
Nengah pengawa ngaku ari Forum Ekonomi Dunya sereta bekerejasama ba pengawa baka Minggu Kuasa Antarabansa 2025 enggau SAREF 4.0, Sarawak diatu nyingkang nyadi pemain global ba ekonomi kuasa beresi. – EDISI UKAS
